ચીની મહિલા સાથે અફેર અને 30 મિનિટમાં 70 હજાર કરોડ સ્વાહા! Nvidiaના CEO જેન્સન હુઆંગના એક પાપે આખી દુનિયામાં મચાવ્યો ખળભળાટ!

દુનિયાની દિગ્ગજ ટેક કંપની Nvidiaના CEO જેન્સન હુઆંગની મુશ્કેલીઓ વધી રહી છે. ચીનની ગુપ્તચર એજન્સી સાથે કથિત સંબંધો ધરાવતી મહિલા સાથેના તેમના સંબંધોની ચર્ચા વચ્ચે કંપનીના શેરમાં ભારે વેચવાલી જોવા મળી છે. સોમવારે શેરબજાર શરૂ થયાના માત્ર 30 મિનિટમાં જ હુઆંગની સંપત્તિમાં 7.4 અબજ ડોલર એટલે કે આશરે 7,030 કરોડ રૂપિયાનો ઘટાડો થયો હતો. આ ઘટાડાને કારણે ફોર્બ્સની રિયલ ટાઇમ અબજોપતિઓની યાદીમાં તેઓ આઠમા સ્થાનેથી સીધા 10મા સ્થાને પહોંચી ગયા હતા.

ફોર્બ્સે આંકડા કર્યા જાહેર

ફોર્બ્સના આંકડા અનુસાર, ટ્રેડિંગ શરૂ થતાં પહેલાં જેન્સન હુઆંગની સંપત્તિ 162.2 અબજ ડોલર એટલે કે આશરે 15.41 લાખ કરોડ રૂપિયા હતી. જોકે, બજાર શરૂ થયાના પ્રથમ અડધા કલાકમાં તેમની સંપત્તિ ઘટીને 154.7 અબજ ડોલર એટલે કે આશરે 14.70 લાખ કરોડ રૂપિયા થઈ ગઈ હતી. સોમવારે Nvidiaના શેર 7 ટકાથી વધુના ઘટાડા સાથે ખુલ્યા હતા. ભારતીય સમય પ્રમાણે આ ઘટાડાની અસર કંપનીના શેરમાં જોવા મળી હતી. અમેરિકી સમય અનુસાર બપોરે 1:30 વાગ્યે પણ શેર 5.5 ટકા નીચે ટ્રેડ થઈ રહ્યા હતા.

30 મિનિટમાં કેમ ઘટી ગઈ જેન્સન હુઆંગની સંપત્તિ?

જેન્સન હુઆંગની મોટાભાગની સંપત્તિ Nvidiaમાં તેમના હિસ્સા સાથે જોડાયેલી છે. આથી કંપનીના શેરના ભાવમાં ઘટાડો થાય ત્યારે તેમની વ્યક્તિગત સંપત્તિ પર પણ સીધી અસર પડે છે. તાજેતરમાં હુઆંગ અને એલિસ હુઆંગ નામની મહિલા સાથે જોડાયેલા અહેવાલો સામે આવ્યા બાદ Nvidiaના શેર પર દબાણ વધ્યું છે. એલિસ હુઆંગ ચીનની નાગરિક છે અને અગાઉ સિંગાપોર સ્થિત ડેટા સેન્ટર કંપની Megaspeed Internationalમાં વરિષ્ઠ અધિકારી તરીકે કામ કરી ચૂકી છે. 'ધ ન્યૂયોર્ક ટાઇમ્સ'ના અહેવાલ અનુસાર, અમેરિકાની ગુપ્તચર એજન્સીઓને શંકા છે કે એલિસ હુઆંગને ચીનની ગુપ્તચર એજન્સીએ જેન્સન હુઆંગ પાસેથી માહિતી મેળવવા માટે નિમણૂક કરી હતી. આ અહેવાલો બાદ Nvidiaના CEOને વિદેશી ગુપ્તચર પ્રવૃત્તિ દ્વારા નિશાન બનાવવામાં આવ્યા હતા કે કેમ તે અંગે સવાલો ઊભા થયા છે. જોકે, એલિસ હુઆંગ સામેના જાસૂસીના આરોપો હજુ સાબિત થયા નથી. ચીને પણ આ આરોપોને ફગાવી દીધા છે અને ચીનની સંડોવણીના દાવાઓને પાયાવિહોણા ગણાવ્યા છે.

Nvidiaના બોર્ડે શરૂ કરી સ્વતંત્ર તપાસ

આ વિવાદ વચ્ચે Nvidiaના બોર્ડ ઓફ ડિરેક્ટર્સે સ્વતંત્ર તપાસ માટે એક સમિતિની રચના કરી છે. આ સમિતિમાં સ્વતંત્ર ડિરેક્ટર્સની સાથે બહારના કાયદાકીય નિષ્ણાતોને પણ સામેલ કરવામાં આવ્યા છે. કંપનીએ સ્પષ્ટતા કરી છે કે તેને એવું માનવાનું કોઈ કારણ નથી કે અમેરિકાની રાષ્ટ્રીય સુરક્ષા અથવા Nvidiaની ગુપ્ત માહિતી સાથે કોઈ ચેડાં થયાં છે. જેન્સન હુઆંગે પણ તપાસમાં સહયોગ આપવાની સંમતિ આપી છે. તપાસ પૂરી ન થાય ત્યાં સુધી તેઓ કંપનીના CEO તરીકે પોતાની જવાબદારી નિભાવતા રહેશે.

પત્ની સાથે બેવફાઈની કબૂલાતથી પણ ચર્ચામાં આવ્યા

આ સમગ્ર વિવાદ વચ્ચે 8 નવેમ્બરે જેન્સન હુઆંગે Nvidiaના કર્મચારીઓને મોકલેલા સંદેશમાં પત્ની લોરી હુઆંગ સાથે બેવફાઈ કરી હોવાની કબૂલાત કરી હતી. તેમણે પોતાના પરિવાર અને કંપનીના કર્મચારીઓની માફી માગી હતી. હુઆંગે સંદેશમાં લખ્યું હતું કે, તેમણે પોતાની પત્નીને દગો આપ્યો છે. તેમના આ પગલાથી પત્ની અને બાળકોને દુઃખ પહોંચ્યું છે અને પોતાની ભૂલ માટે તેમની પાસે કોઈ બહાનું નથી. તેમણે કહ્યું હતું કે તેઓ આ માટે ખૂબ જ માફી માગે છે. તેમણે કંપનીના કર્મચારીઓનો વિશ્વાસ જાળવવાની પોતાની જવાબદારીમાં પણ ખામી રહી હોવાનું સ્વીકાર્યું હતું. આ કબૂલાત બાદ તેમના 41 વર્ષ જૂના લગ્નજીવન અને સંભવિત છૂટાછેડાની ચર્ચા પણ શરૂ થઈ હતી.

છૂટાછેડા થાય તો પત્નીને મળી શકે 7.6 લાખ કરોડ રૂપિયા?

જેન્સન હુઆંગની અંગત જિંદગી સાથે જોડાયેલા વિવાદ બાદ તેમની પત્ની લોરી હુઆંગને સંભવિત છૂટાછેડામાં કેટલી સંપત્તિ મળી શકે તે અંગે પણ ચર્ચા થઈ રહી છે. અગાઉના એક અહેવાલમાં કેલિફોર્નિયાના કોમ્યુનિટી પ્રોપર્ટી કાયદાના આધારે અનુમાન લગાવવામાં આવ્યું હતું કે જો બંનેના છૂટાછેડા થાય તો લોરી હુઆંગને 80 અબજ ડોલર એટલે કે આશરે 7.6 લાખ કરોડ રૂપિયા મળી શકે છે. જેન્સન અને લોરી હુઆંગે 1985માં લગ્ન કર્યા હતા. કેલિફોર્નિયાના કાયદા પ્રમાણે લગ્નજીવન દરમિયાન એકત્રિત કરવામાં આવેલી સંપત્તિ સામાન્ય રીતે પતિ-પત્નીની સંયુક્ત સંપત્તિ ગણાય છે અને છૂટાછેડા થાય તો તેની સરખે ભાગે વહેંચણી થઈ શકે છે. જોકે, આ માત્ર કાલ્પનિક ગણતરી છે. દંપતી છૂટાછેડા લેવાનું વિચારી રહ્યું હોવાના કોઈ સંકેત નથી. બંને વચ્ચે લગ્ન પહેલાં કોઈ પ્રિનપ્શિયલ એગ્રીમેન્ટ થયું હતું કે નહીં તેની પણ જાહેરમાં પુષ્ટિ થઈ નથી. આ ઉપરાંત, જેન્સનની સમગ્ર સંપત્તિ સંયુક્ત વૈવાહિક સંપત્તિ ગણાય તે જરૂરી નથી.

Nvidiaના શેરમાં ઘટાડાથી રોકાણકારોમાં ચિંતા

Nvidiaના શેરમાં થયેલો ઘટાડો દર્શાવે છે કે કંપનીના CEO સાથે જોડાયેલા વિવાદો રોકાણકારોના વિશ્વાસને અસર કરી શકે છે. જેન્સન હુઆંગ Nvidiaની સફળતા અને વૈશ્વિક AI ક્રાંતિનો મહત્ત્વનો ચહેરો છે. તેમના નેતૃત્વમાં કંપની આર્ટિફિશિયલ ઇન્ટેલિજન્સ માટે જરૂરી ચિપ્સના ક્ષેત્રમાં અગ્રણી બની છે. હવે કંપનીના બોર્ડની તપાસના પરિણામ પર રોકાણકારોની નજર રહેશે. ખાસ કરીને કથિત વિદેશી ગુપ્તચર પ્રવૃત્તિનો કંપનીના કારોબાર કે ગુપ્ત માહિતી સાથે કોઈ સંબંધ છે કે નહીં તે મહત્ત્વનું બની રહેશે. હાલ પૂરતું Nvidiaએ કંપનીની ગુપ્ત માહિતી કે રાષ્ટ્રીય સુરક્ષા સાથે ચેડાં થયાં હોવાની કોઈ જાણકારી ન હોવાનું જણાવ્યું છે. તપાસનું પરિણામ અને આ વિવાદની કંપનીની પ્રતિષ્ઠા પર પડતી અસર આગામી સમયમાં મહત્ત્વની સાબિત થઈ શકે છે.