બેંક ગ્રાહકો ખાસ વાંચે: અક્ટોબર 2026માં 11 દિવસ તાળાં વાગશે, રજાઓનું લિસ્ટ જાહેર

અક્ટોબર મહિનામાં જો તમારે બેંક સાથે જોડાયેલું કોઈ જરૂરી કામ કરવું હોય, તો તમારા માટે એક મહત્વના સમાચાર છે. નવા મહિનામાં તહેવારો અને અલગ-અલગ રાજ્યોની રજાઓના કારણે ઘણા દિવસો સુધી બેંક શાખાઓ બંધ રહેશે. કેટલાક રાજ્યોમાં 11 દિવસની રજાઓ હોઈ શકે છે. જોકે, દરેક રાજ્યમાં બેંકની રજાઓ એક સરખી નહીં હોય. ગાંધી જયંતીથી લઈને દશેરા અને દુર્ગા પૂજા સુધીના અનેક મોટા તહેવારો આ જ મહિનામાં આવી રહ્યા છે. આ સિવાય રવિવાર અને બીજા-ચોથા શનિવારે પણ બેંકો બંધ રહેશે.

તેનો અર્થ એ નથી કે બેંકિંગ સેવાઓ કામ નહીં કરે. રજાના દિવસે પણ તમે UPI, ATM, મોબાઈલ બેંકિંગ અને ઈન્ટરનેટ બેંકિંગ જેવી ડિજિટલ સેવાઓનો ઉપયોગ કરી શકો છો. પરંતુ જો તમારે બેંક શાખામાં જઈને કેશ જમા કરાવવી હોય, ચેક સંબંધિત કામ હોય કે કોઈ ડોક્યુમેન્ટ્સ જમા કરાવવાના હોય, તો રજાઓની તારીખ પહેલાંથી જ જોઈ લેવી વધુ સારું રહેશે.

અક્ટોબર બેંક હોલિડે લિસ્ટ

2 અક્ટોબરે આખા દેશમાં બેંકો બંધ

અક્ટોબર મહિનાની શરૂઆત જ બેંકની રજાથી થશે. 2 અક્ટોબરે મહાત્મા ગાંધી જયંતીના પ્રસંગે દેશભરમાં બેંક શાખાઓ બંધ રહેશે. આ રાષ્ટ્રીય રજા છે. એવામાં જો તમારું કોઈ જરૂરી બેંકિંગ કામ હોય, તો તેને 2 અક્ટોબર પહેલાં જ પતાવી લેવું યોગ્ય રહેશે. આ પછીની રજાઓ મુખ્યત્વે અલગ-અલગ રાજ્યો અને શહેરોમાં ઉજવાતા તહેવારો મુજબ રહેશે.

દુર્ગા પૂજા પર અનેક રાજ્યોમાં રજા

અક્ટોબરના ત્રીજા અઠવાડિયામાં બેંકોમાં રજાઓ વધુ રહેશે. 19 અક્ટોબરે દશેરાના કારણે અગરતલા, આઈઝોલ, ભુવનેશ્વર, ચેન્નઈ, ગુવાહાટી, ઈમ્ફાલ, કોલકાતા, પટના, રાંચી અને શિલોંગ સહિત અનેક જગ્યાએ બેંકો બંધ રહેશે. 20 અક્ટોબરે ગંગટોક અને ઈમ્ફાલમાં રજા છે. તો 21 અક્ટોબરે અગરતલા, બેંગલુરુ, ગંગટોક, ગુવાહાટી, કોચી, કોલકાતા અને તિરુવનંતપુરમમાં બેંકો બંધ રહેશે. સિક્કિમના ગંગટોકમાં 22 અને 23 અક્ટોબરે પણ દુર્ગા પૂજાના કારણે રજા રહેશે. જોકે, રાજ્ય અને શહેર અનુસાર રજાઓ અલગ-અલગ હોઈ શકે છે.

રવિવાર અને બીજા-ચોથા શનિવારે પણ બેંકો બંધ

તહેવારો સિવાય અક્ટોબરમાં નિયમિત સાપ્તાહિક રજાઓ પણ રહેશે. 4, 11, 18 અને 25 અક્ટોબરે રવિવાર છે, આ દિવસોમાં દેશભરમાં બેંક શાખાઓ બંધ રહેશે. આ સિવાય 10 અક્ટોબરે બીજો શનિવાર અને 24 અક્ટોબરે ચોથો શનિવાર છે. RBIના નિયમો મુજબ આ બંને દિવસે પણ બેંકો બંધ રહે છે. તેથી અક્ટોબરમાં ઘણી જગ્યાએ સતત કે આસપાસના દિવસોમાં બેંકિંગ કામકાજ પ્રભાવિત થઈ શકે છે.

26 અક્ટોબરથી હડતાળ થઈ તો વધી શકે છે મુશ્કેલીઓ

અક્ટોબરના અંતમાં બેંક ગ્રાહકો માટે વધુ એક મોટી પડકારજનક સ્થિતિ સામે આવી શકે છે. યુનાઈટેડ ફોરમ ઓફ બેંક યુનિયન્સ (UFBU) એ 5 દિવસના વર્કિંગ વીકની માંગણી સાથે 26 અક્ટોબર 2026 થી અચોક્કસ મુદતની હડતાળની જાહેરાત કરી છે. જો આ હડતાળ થશે, તો બેંક શાખાઓનું કામકાજ ખોરવાઈ શકે છે.

જોકે, બેંક બંધ રહેવા કે હડતાળ દરમિયાન પણ UPI, ATM, ઈન્ટરનેટ બેંકિંગ અને મોબાઈલ બેંકિંગ જેવી સેવાઓ ઉપલબ્ધ રહેશે. તેથી જરૂરી કામ માટે ડિજિટલ બેંકિંગનો ઉપયોગ કરી શકાય છે.