Grammy 2026: Dalai Lamaએ જીત્યો પહેલો ગ્રેમી એવોર્ડ, આ કેટેગરીમાં મારી બાજી

તિબેટના બૌદ્ધ ધર્મના સર્વોચ્ચ આધ્યાત્મિક નેતા દલાઈ લામાએ પોતાનો પ્રથમ ગ્રેમી એવોર્ડ જીતી લીધો છે. 68મા વાર્ષિક ગ્રેમી એવોર્ડ સમારોહમાં દલાઈ લામાએ તેમના આલ્બમ માટે 'બેસ્ટ ઓડિયો બુક, નેરેશન અને સ્ટોરીટેલિંગ રેકોર્ડિંગ' કેટેગરીમાં આ એવોર્ડ જીત્યો છે. તેમના આ આલ્બમનું નામ 'મેડિટેશન: ધ રિફ્લેક્શન્સ ઓફ હિઝ હોલીનેસ ધ દલાઈ લામા' (Meditation: The Reflections of His Holiness the Dalai Lama) છે.

આ સાથે જ, તેઓ કે-પોપ (K-Pop) અને સ્ટીવન સ્પીલબર્ગ સાથે પ્રથમ વખત એવોર્ડ જીતનારાઓની યાદીમાં સામેલ થઈ ગયા છે. ગ્રેમી એ સંગીતની દુનિયાનું સૌથી પ્રતિષ્ઠિત સન્માન છે, જે 'રેકોર્ડિંગ એકેડેમી' દ્વારા દર વર્ષે કલાકારો અને ટેકનિકલ વ્યાવસાયિકોની ઉત્કૃષ્ટ સિદ્ધિઓ માટે આપવામાં આવે છે.

કોણ છે દલાઈ લામા?

દલાઈ લામા તિબેટના બૌદ્ધ ધર્મના સર્વોચ્ચ આધ્યાત્મિક ગુરુ માનવામાં આવે છે. તેમનો જન્મ 6 જુલાઈ 1935ના રોજ તિબેટના એક નાનકડા ગામમાં થયો હતો. માત્ર બે વર્ષની ઉંમરે તેમની ઓળખ દલાઈ લામાના પુનર્જન્મ તરીકે કરવામાં આવી હતી અને ત્યારથી તેમનું જીવન આધ્યાત્મિક સાધના, કરુણા અને માનવતાના સંદેશને સમર્પિત થઈ ગયું હતું.

નોબેલ શાંતિ પુરસ્કારથી પણ સન્માનિત છે દલાઈ લામા

દલાઈ લામા માત્ર એક ધાર્મિક ગુરુ નથી, પરંતુ તેઓ શાંતિ, અહિંસા, કરુણા અને પરસ્પર સદભાવના વૈશ્વિક પ્રતીક પણ છે. તેમણે સમગ્ર વિશ્વમાં ભ્રમણ કરીને માનવ મૂલ્યો, માનસિક શાંતિ અને પરસ્પર સમજણ પર વ્યાખ્યાન આપ્યા છે. વર્ષ 1989માં તેમને તિબેટના મુદ્દાને શાંતિપૂર્ણ રીતે ઉઠાવવા અને અહિંસાનો સંદેશ ફેલાવવા બદલ નોબેલ શાંતિ પુરસ્કારથી સન્માનિત કરવામાં આવ્યા હતા. આ એક ખૂબ જ મોટું સન્માન છે.