ફોટોગ્રાફી બની કાળ:કર્ણાટકમાં કાવેરી નદીમાં ડૂબી જવાથી 5 લોકોના મોત, એક જ પરિવારના 4 સભ્યોએ ગુમાવ્યો જીવ

કર્ણાટકના (Karnataka) માંડ્યા જિલ્લામાં આવેલા પ્રખ્યાત પ્રવાસન સ્થળ મુથરાયન રવિ (Muthathi) ખાતે મંગળવારની સાંજે એક અત્યંત હૃદયદ્રાવક ઘટના સામે આવી છે. કાવેરી નદીમાં (Cauvery River) ન્હાવા અને ફોટોગ્રાફી કરવા ગયેલા એક જ પરિવારના 4 સભ્યો સહિત કુલ 5  લોકોના ડૂબી જવાથી મોત નીપજ્યા છે. મંદિરના દર્શન કર્યા બાદ પરિવાર ખુશી-ખુશી નદી કિનારે ગયો હતો, પરંતુ એક નાનકડી ભૂલ આખા પરિવાર માટે કાળ સાબિત થઈ.

દર્શન બાદ ફોટોગ્રાફી (Photography) બની કાળ

પોલીસના જણાવ્યા અનુસાર, આ પરિવાર બેંગલુરુના (Bengaluru) બ્યાદરાહલ્લી વિસ્તારનો રહેવાસી હતો.  પરિવારના સભ્યો તેમના ડ્રાઈવર સાથે પહેલા કબ્બાલમ્મા મંદિર અને ત્યારબાદ મુથરાયન રવિ સ્થિત મુથાથિરાયા મંદિરે દર્શને ગયા હતા. દર્શન પતાવીને સાંજે આશરે 4.45 થી 5.00 વાગ્યાની વચ્ચે તમામ લોકો નજીકથી વહેતી કાવેરી નદી કિનારે ગયા હતા. ચાર મહિલાઓ નદીના છીછરા પાણીમાં ઉતરીને ફોટો પડાવી રહી હતી.

ન્હાતી વખતે વિજયમ્મા (૫૦) નામની મહિલાનો પગ અચાનક લપસ્યો અને તે નદીના ઊંડા પાણીમાં ગરકાવ થવા લાગી. તેને બચાવવા માટે પરિવારના અન્ય સભ્યો અને તેમનો ડ્રાઈવર એક પછી એક પાણીમાં ઉતર્યા, પરંતુ નદીના જોરદાર પ્રવાહમાં (Strong Current) તમામ લોકો વહી ગયા.

હોમગાર્ડની ચેતવણી (Warnings) ને અવગણી

વરિષ્ઠ પોલીસ અધિકારી (Senior Cop) શોભા રાણીએ જણાવ્યું કે, નદી કિનારે તૈનાત હોમગાર્ડ્સ (Home Guards) દ્વારા પરિવારને ઊંડા પાણીમાં ન જવા માટે વારંવાર ચેતવણી આપવામાં આવી હતી. પરંતુ, પાણી ઉપરથી શાંત દેખાતું હોવાથી પરિવારે નદીની ઊંડાઈ અને અંડરવોટર કરંટનો (Underwater Currents) અંદાજો લગાવવામાં ભૂલ કરી દીધી.

મૃતકોની ઓળખ:
 વિજયમ્મા (ઉંમર ૫૦ વર્ષ)
 શ્વેતા (ઉંમર ૩૮ વર્ષ)
 પ્રિયંકા (ઉંમર ૨૮ વર્ષ)
 ચૈત્રા (ઉંમર ૨૦ વર્ષ)
 મહેશ (ડ્રાઈવર)

4 વર્ષનું બાળક અને એક યુવક આબાદ બચ્યા

આ ભયાનક દુર્ઘટના વચ્ચે પણ કુદરતી કરિશ્મા જોવા મળ્યો હતો. પરિવાર સાથે આવેલું એક 4 વર્ષનું માસૂમ બાળક બિલકુલ સુરક્ષિત બચી ગયું છે. આ ઉપરાંત, પરિવારના અન્ય એક સભ્ય રવિએ પણ મહિલાઓને બચાવવા માટે નદીમાં ઝંપલાવ્યું હતું, પરંતુ સ્થાનિક લોકોએ (Locals) સમયસૂચકતા વાપરીને તેને પાણીમાંથી બહાર ખેંચી લીધો હતો, જેના કારણે તેનો જીવ બચી ગયો હતો.

પોલીસ તપાસ અને પોસ્ટમોર્ટમ (Post-mortem)

ઘટનાની જાણ થતાં જ ફાયર એન્ડ ઇમરજન્સી સર્વિસીસની (Fire and Emergency Services) ટીમ ઘટનાસ્થળે દોડી ગઈ હતી. ભારે જહેમત બાદ નદીમાંથી પાંચેય મૃતદેહો બહાર કાઢવામાં આવ્યા હતા અને તેમને પોસ્ટમોર્ટમ માટે માંડ્યાની MIMS હોસ્પિટલમાં ખસેડાયા હતા. સ્થાનિક પોલીસે આ મામલે કેસ નોંધીને વધુ તપાસ (Investigation) હાથ ધરી છે.