મહાકાય ટેન્કરે ક્રૂઝ શિપને મારી જોરદાર ટક્કર, 180 મુસાફરોથી ભરેલી બોટ નદીમાં પલટી — જુઓ પછી શું થયું!
શુક્રવારે મિસિસિપી નદી પર ન્યૂ ઓર્લિયન્સના પોર્ટ પર ઊભેલી એક રિવર ક્રૂઝ શિપ સાથે એક ટેન્કરની જોરદાર ટક્કર થઈ ગઈ. ટેન્કર કથિત રીતે સ્ટિયરિંગ પરથી કાબૂ ગુમાવી બેઠું હતું. લગભગ 180 લોકોની ક્ષમતા ધરાવતી ક્રૂઝ બોટમાં પાણી ભરવા લાગ્યું અને તે પલટી ગઈ, પરંતુ તમામ મુસાફરો અને ક્રૂ મેમ્બર્સ સુરક્ષિત રીતે બચી ગયા. મેયર હેલેના મોરેનોએ એક પ્રેસ કોન્ફરન્સમાં જણાવ્યું કે, મિસિસિપી નદી પર આ એક ખરેખર ચમત્કાર છે. કોઈ પણ વ્યક્તિ ગુમ નથી. તેમણે જણાવ્યું કે 32 લોકોને હોસ્પિટલ લઈ જવામાં આવ્યા હતા, પરંતુ કોઈની પણ હાલત ગંભીર નથી.
વિડિયોમાં જોવા મળ્યું કે, એક મોટું ટેન્કર (એટલાન્ટિક એસ્ફાલ્ટ) ડોક પર ઊભેલી ક્રૂઝ બોટ સાથે અથડાયું હતું. ધાતુ અને કાચના ટુકડાઓ ચારેય તરફ વેરાઈ ગયા હતા. ટગબોટ ઓપરેટર્સ, પોલીસ, નજીકના મજૂરો અને બચાવકર્મીઓએ તાત્કાલિક બચાવ કામગીરી શરૂ કરી દીધી હતી. અનેક લોકો અને બે પોલીસ અધિકારીઓને 19 ડિગ્રી સેલ્સિયસ તાપમાનવાળા નદીના ઠંડા પાણીમાંથી બહાર કાઢવામાં આવ્યા હતા.
રેસ્ક્યુ ઓપરેશન ચાલુ હતું તે દરમિયાન જ બોટમાં પાણી ભરાઈ ગયું અને તે પલટી ગઈ. એક પ્રત્યક્ષદર્શીએ જણાવ્યું કે, ત્યાં ભારે અફરા-તફરી મચી ગઈ હતી. મદદ માટે અનેક જહાજો ત્યાં આવી પહોંચ્યા હતા.
કોસ્ટ ગાર્ડના કેપ્ટન મેલાની બર્નમે જણાવ્યું કે, એવું લાગે છે કે ટેન્કરનું સ્ટિયરિંગ કંટ્રોલ બહાર થઈ ગયું હતું, પરંતુ તેનું ચોક્કસ કારણ હજુ સ્પષ્ટ થયું નથી. નેશનલ ટ્રાન્સપોર્ટેશન સેફટી બોર્ડ આ મામલાની તપાસ કરશે, પરંતુ દેશભરમાં ઉડાનો અટકી જવાના કારણે તપાસ ટીમ તાત્કાલિક સ્થળ પર પહોંચી શકી નહોતી.
ક્રૂઝ કંપનીએ રોલ કોલ દ્વારા તમામની ઉપસ્થિતિ સુનિશ્ચિત કરી હતી. આ દુર્ઘટનામાં ઘણા લોકોના ઓળખપત્રો, ફોન અને ચાવીઓ ખોવાઈ ગયા હતા. મોટાભાગના મુસાફરો બહારગામના હતા. મેયરે જણાવ્યું કે તેમના માટે ચાર્જર, ભોજન, હોટેલ અને વાહનવ્યવહારની વ્યવસ્થા કરવામાં આવી રહી છે.
