કોલકાતામાં હાઇજેકની ધમકીથી એર ઇન્ડિયાની ફ્લાઇટ ગ્રાઉન્ડેડ, ટોઇલેટમાં મળી ચિઠ્ઠી

મુંબઈ જવા માટે તૈયાર એર ઇન્ડિયાની એક ફ્લાઇટને હાઇજેકની ધમકી મળતાં બુધવારે કોલકાતા એરપોર્ટ પર ગ્રાઉન્ડેડ (Grounded) કરવામાં આવી હતી. વિમાન ઉડાન ભરે તે પહેલાં જ પાયલટે એર ટ્રાફિક કંટ્રોલ (ATC)ને આ અંગે જાણ કરી હતી. વિમાનના ટોઇલેટમાં કાગળની એક ચિઠ્ઠી મળી હતી, જેમાં વિમાનને હાઇજેક કરવાની ધમકી આપવામાં આવી હતી. મળતી માહિતી મુજબ, આ ફ્લાઇટ એર ઇન્ડિયાની હતી, પરંતુ તે વિસ્તારા (Vistara)ની લિવરીમાં સંચાલિત થઈ રહી હતી. કોલકાતાથી મુંબઈ જતી આ ફ્લાઇટ સવારે 10:20 વાગ્યે ઉડાન ભરવાની હતી. જોકે, વિમાનના ક્રૂ મેમ્બર્સને ટોઇલેટમાં શંકાસ્પદ ચિઠ્ઠી મળી આવતાં તેમણે તરત જ પાયલટને જાણ કરી હતી. ત્યારબાદ પાયલટે ATC ટાવરને એલર્ટ કર્યો હતો. ચિઠ્ઠીમાં લખવામાં આવ્યું હતું કે વિમાનનું સવારે 11:10 વાગ્યે હાઇજેક કરવામાં આવશે. કોલકાતાના નેતાજી સુભાષચંદ્ર બોઝ આંતરરાષ્ટ્રીય એરપોર્ટના ડિરેક્ટર વિક્રમ સિંહે આ ઘટનાની પુષ્ટિ કરી હતી. ઘટના બાદ તમામ મુસાફરોને વિમાનમાંથી સુરક્ષિત રીતે નીચે ઉતારવામાં આવ્યા હતા. ત્યારબાદ વિમાનને આઇસોલેશન બે (Isolation Bay)માં લઈ જવામાં આવ્યું હતું. સુરક્ષા એજન્સીઓ દ્વારા વિમાનની ઝીણવટભરી તપાસ હાથ ધરવામાં આવી હતી. વિમાનમાં કોઈ શંકાસ્પદ વસ્તુ કે અન્ય જોખમી સામગ્રી છે કે નહીં તેની ચકાસણી કરવામાં આવી રહી હતી.

અગાઉ ઇન્ડિગોની ફ્લાઇટને પણ મળી હતી ધમકી

આ અગાઉ 23 ઓક્ટોબરે દિલ્હીથી ચેન્નાઈ જતી ઇન્ડિગો (IndiGo)ની ફ્લાઇટને પણ બોમ્બની ધમકી મળી હતી. વિમાન ટેકઓફ માટે તૈયાર થઈ રહ્યું હતું ત્યારે તેના પાછળના ટોઇલેટમાં ધમકીભરી ચિઠ્ઠી મળી આવી હતી. ત્યારબાદ વિમાનને દિલ્હી એરપોર્ટ પર પરત બે તરફ લઈ જવામાં આવ્યું હતું. એરલાઇન દ્વારા જરૂરી સ્ટાન્ડર્ડ ઓપરેટિંગ પ્રોસિજર (SOP) પૂર્ણ કર્યા બાદ સુરક્ષા એજન્સીઓએ આ ધમકીને અફવા (Hoax) જાહેર કરી હતી. કોલકાતાની તાજેતરની ઘટનામાં પણ સુરક્ષા તપાસ પૂર્ણ થયા બાદ જ આગળની કાર્યવાહી અંગે નિર્ણય લેવામાં આવશે.