Video: 'દેશની સુરક્ષા સાથે બાંધછોડ નહીં...' એર ઇન્ડિયા ફ્લાઇટ હાઇજેકની ધમકી બાદ ભાજપ અધ્યક્ષનું મોટું નિવેદન!

કોલકાતાના નેતાજી સુભાષચંદ્ર બોઝ ઇન્ટરનેશનલ એરપોર્ટ પરથી મુંબઈ જવા રવાના થઈ રહેલી એર ઇન્ડિયાની ફ્લાઇટમાંથી એક શંકાસ્પદ ચિઠ્ઠી મળી આવતા ભારે અફરાતફરીનો માહોલ સર્જાયો છે. વિમાનના વોશરૂમમાંથી મળેલી આ ચિઠ્ઠીમાં વિમાન હાઇજેક કરવાની ધમકી આપવામાં આવી હતી, જેના પગલે એરપોર્ટ સુરક્ષા એજન્સીઓ અને સુરક્ષા દળો તાત્કાલિક એલર્ટ થઈ ગયા છે.

આ ગંભીર સુરક્ષા ચૂક અને ધમકીના મામલે પશ્ચિમ બંગાળ ભાજપના પ્રદેશ અધ્યક્ષ સમિક ભટ્ટાચાર્યએ મહત્ત્વનું નિવેદન આપ્યું છે. તેમણે દેશની આંતરિક સુરક્ષાને સર્વોપરી ગણાવતા કહ્યું કે, દેશની આંતરિક સુરક્ષા સાથે કોઈપણ સંજોગોમાં બાંધછોડ કરવામાં આવશે નહીં અને સરકાર આ બાબતને અત્યંત ગંભીરતાથી લઈ રહી છે.

સમિક ભટ્ટાચાર્યએ સ્થિતિ અંગે વાત કરતાં જણાવ્યું હતું કે, "પશ્ચિમ બંગાળમાં કાયદો અને વ્યવસ્થાની સ્થિતિમાં ઘણો સુધારો થયો છે અને છેલ્લા છ મહિનામાં પરિસ્થિતિ બદલાઈ છે. દેશની આંતરિક સુરક્ષા સાથે કોઈપણ ભોગે સમાધાન થઈ શકે નહીં. અમે સમગ્ર પરિસ્થિતિ પર સતત નજર રાખી રહ્યા છીએ અને સરકારે આ ઘટનાની ગંભીર નોંધ લીધી છે. હાલ આ મામલે કાયદેસરની કાર્યવાહી ચાલી રહી છે અને તમામ એરપોર્ટ સંપૂર્ણપણે સુરક્ષિત છે. જોકે આપણે સરહદ સંપૂર્ણપણે સીલ કરવામાં સફળ રહ્યા નથી, પરંતુ અમારા મુખ્યમંત્રી સુવેન્દુ અધિકારી 'ઝીરો ટોલરન્સ' નીતિ સાથે કામ કરી રહ્યા છે અને કેન્દ્રીય ગૃહમંત્રી પણ આ અંગે સક્રિય પગલાં લઈ રહ્યા છે."

આ ઘટના બાદ એરપોર્ટ પર વિમાન અને મુસાફરોની સઘન તપાસ હાથ ધરવામાં આવી હતી તેમજ ફ્લાઇટમાં કડક સુરક્ષા પ્રોટોકોલ લાગુ કરવામાં આવ્યા હતા. હાલ સુરક્ષા એજન્સીઓ આ ચિઠ્ઠી કોણે અને કયા હેતુથી મૂકી હતી તેની ઊંડાણપૂર્વક તપાસ કરી રહી છે.