દિલ્હી-NCRના મુસાફરો માટે મોદી સરકારની મોટી ભેટ: નોઈડા-ગ્રેટર નોઈડા એક્વા લાઇન મેટ્રો વિસ્તરણને કેન્દ્રીય કેબિનેટની લીલી ઝંડી!
વડાપ્રધાન નરેન્દ્ર મોદીના અધ્યક્ષપદે મળેલી કેન્દ્રીય કેબિનેટ બેઠકમાં દિલ્હી-NCR ક્ષેત્રમાં જાહેર પરિવહન અને કનેક્ટિવિટીને વેગ આપતો એક મહત્વપૂર્ણ નિર્ણય લેવામાં આવ્યો છે. કેન્દ્રીય મંત્રીમંડળે નોઈડા અને ગ્રેટર નોઈડા વચ્ચે કાર્યરત 'એક્વા લાઇન' મેટ્રો કોરિડોરના વિસ્તરણ પ્રોજેક્ટને સત્તાવાર મંજૂરી આપી દીધી છે. આ નવા પ્રોજેક્ટ હેઠળ નોઈડા સેક્ટર-૫૧થી ગ્રેટર નોઈડા સેક્ટર-૪ સુધી નવી મેટ્રો લાઇન બિછાવવામાં આવશે.
કેન્દ્ર સરકાર દ્વારા મંજૂર કરવામાં આવેલો આ નવો કોરિડોર કુલ 8.449 કિલોમીટર લાંબો હશે અને તેના પર 5 નવા મેટ્રો સ્ટેશનો બનાવવામાં આવશે. આ વિસ્તરણથી દિલ્હી, નોઈડા અને ગ્રેટર નોઈડા વચ્ચે દૈનિક ધોરણે અપડાઉન કરતા લાખો મુસાફરો, નોકરીયાતો અને વિદ્યાર્થીઓની મુસાફરી વધુ ઝડપી, સુગમ અને સરળ બનશે.
આ મેટ્રો પ્રોજેક્ટ માત્ર સમયની બચત જ નહીં, પરંતુ નોઈડા અને ગ્રેટર નોઈડા એક્સપ્રેસવે તેમજ આસપાસના મુખ્ય માર્ગો પર ટ્રાફિકનું ભારણ ઘટાડવામાં પણ મહત્વની ભૂમિકા ભજવશે. પ્રદૂષણ નિયંત્રણ અને ઇકો-ફ્રેન્ડલી શહેરી પરિવહનને પ્રોત્સાહન આપવાના ભાગરૂપે આ પ્રોજેક્ટને સમયમર્યાદામાં પૂર્ણ કરવાનો લક્ષ્યાંક રાખવામાં આવ્યો છે.
