મોદી સરકાર પર સોનિયા ગાંધીના પ્રહાર, કહ્યું- પગ નીચેથી જમીન સરકી ગઈ, લાંબો સમય નહીં ટકે સરકાર

કોંગ્રેસ સંસદીય દળનાં અધ્યક્ષ સોનિયા ગાંધીએ વડાપ્રધાન નરેન્દ્ર મોદી અને કેન્દ્ર સરકાર પર આકરા પ્રહારો કર્યા છે. પોતાના નવા સંસ્મરણ (Memoir) ‘Belonging: A Journey of Love’માં તેમણે વર્તમાન સરકારની કામગીરી અને નિર્ણયોને લઈને સવાલો ઉઠાવ્યા છે. સોનિયા ગાંધીએ લખ્યું છે કે સરકારનાં પગલાંમાં અસુરક્ષાની ભાવના દેખાય છે અને આ સરકાર લાંબા સમય સુધી સત્તામાં નહીં રહે. સોનિયા ગાંધીનું આ પુસ્તક મંગળવારે બજારમાં આવ્યું છે. તેમાં તેમણે દેશની વર્તમાન રાજકીય અને સામાજિક પરિસ્થિતિ અંગે પોતાના વિચારો રજૂ કર્યા છે. તેમણે ખાસ કરીને દેશની યુવા પેઢી પર વિશ્વાસ વ્યક્ત કર્યો છે. તેમના મતે, આજના યુવાનોમાં ન્યાય અને નિષ્પક્ષતા માટે ઊભા રહેવાની ઇચ્છા છે. તેમણે લખ્યું છે કે યુવાનોમાં દમનકારી વ્યવસ્થાઓ અને અન્યાયનો અંત લાવવાની ભાવના જોવા મળે છે. સોનિયા ગાંધીને આશા છે કે નવી પેઢી ભારતની એકતા, લોકશાહી મૂલ્યો, સહિયારા વારસા અને આઝાદીની રક્ષા માટે આગળ આવશે. તેમના મતે, યુવાનો દેશના ઘા રૂઝવવામાં અને સમાજને વધુ મજબૂત બનાવવામાં મહત્વની ભૂમિકા ભજવી શકે છે.

ઇટાલીના બાળપણથી ભારતના રાજકારણ સુધીની સફર

‘Belonging: A Journey of Love’માં સોનિયા ગાંધીએ પોતાના જીવનના અનેક અંગત અને રાજકીય પ્રસંગોને સ્થાન આપ્યું છે. પુસ્તકમાં ઇટાલીમાં વિતાવેલું બાળપણ, કેમ્બ્રિજમાં રાજીવ ગાંધી સાથે થયેલી પ્રથમ મુલાકાત અને લગ્ન બાદ ભારત આવ્યા પછીના જીવનનો ઉલ્લેખ છે. આ ઉપરાંત, રાજીવ ગાંધીની હત્યા બાદના મુશ્કેલ સમય અને ત્યારબાદ કોંગ્રેસની જવાબદારી સંભાળવા સુધીની સફર પણ તેમણે વર્ણવી છે. પરિવારના અંગત જીવનની સાથે દેશના રાજકીય પરિવર્તનો અંગેના પોતાના અનુભવો પણ સંસ્મરણમાં રજૂ કર્યા છે.

સરકારની કામગીરી પર સવાલો

સોનિયા ગાંધીએ પુસ્તકમાં કેન્દ્ર સરકારના નિર્ણયોને લઈને પોતાની ટીકા વ્યક્ત કરી છે. તેમના મતે, સરકારના વલણ અને કામગીરીમાં અસુરક્ષાની ભાવના પ્રતિબિંબિત થાય છે. તેમણે વર્તમાન સરકાર લાંબો સમય સત્તામાં નહીં રહે તેવી આગાહી પણ કરી છે. આ નિવેદન તેમની રાજકીય ટીકા અને વ્યક્તિગત મૂલ્યાંકન તરીકે જોવામાં આવે છે. નોંધનીય છે કે આ પુસ્તકમાં સોનિયા ગાંધીએ પોતાના અંગત જીવનના અનુભવોની સાથે ભારતની લોકશાહી, સામાજિક એકતા અને ભાવિ પેઢી પ્રત્યેની આશાઓ પણ વ્યક્ત કરી છે.