અનોખી માંગઃ આ સમુદાય હવે SC યાદીમાંથી બહાર થવા માગે છે, જાણો શું છે કારણ
ભારતમાં અનામત (Reservation)ને લઈને સમયાંતરે વિવિધ સમુદાયોની માંગ સામે આવતી રહે છે
ભારતમાં અનામત (Reservation)ને લઈને સમયાંતરે વિવિધ સમુદાયોની માંગ સામે આવતી રહે છે. સામાન્ય રીતે કોઈ સમુદાયને અનુસૂચિત જાતિ (Scheduled Caste-SC) અથવા અન્ય પછાત વર્ગ (OBC)માં સામેલ કરવાની માંગ કરવામાં આવે છે. જોકે, તમિલનાડુના દેવેનદ્રકુલ વેલ્લાલર (Devendrakula Vellalar-DKV) સમુદાય સાથે જોડાયેલી એક અલગ પ્રકારની માંગ ચર્ચામાં છે. સમુદાયના કેટલાક નેતાઓ અને પ્રતિનિધિઓ SC યાદીમાંથી બહાર કરવાની માંગ લાંબા સમયથી કરી રહ્યા છે.
આ માંગ પાછળ અનામતનો લાભ છોડવાની સાથે સામાજિક ઓળખ અને આત્મસન્માન જેવા મુદ્દાઓનો ઉલ્લેખ કરવામાં આવે છે. જોકે, આ માંગ સમગ્ર સમુદાયની સર્વસંમતિ દર્શાવે છે કે નહીં તે અંગે અલગ-અલગ મતો પણ સામે આવે છે.
2021માં સાત સમુદાયોને એક નામ હેઠળ લાવવામાં આવ્યા
દેવેનદ્રકુલ વેલ્લાલર સમુદાયની ઓળખ સાથે જોડાયેલો મહત્વપૂર્ણ ફેરફાર 2021માં થયો હતો. સંસદે બંધારણ (અનુસૂચિત જાતિ) આદેશમાં સુધારો કરીને દેવેનદ્રકુલથન, કલ્લાડી, કુડુમ્બન, પલ્લન, પન્નાડી અને વથિરિયાન સહિત અલગ-અલગ નોંધાયેલા સમુદાયોને ‘દેવેનદ્રકુલ વેલ્લાલર’ નામ હેઠળ એકીકૃત કર્યા હતા. આ ફેરફાર તમિલનાડુ સરકાર દ્વારા કરાયેલી ભલામણોના આધારે કરવામાં આવ્યો હતો.
SC યાદીમાંથી બહાર થવાની માંગ શા માટે?
સમુદાયના નેતા કે. કૃષ્ણસામીએ દાવો કર્યો છે કે દેવેનદ્રકુલ વેલ્લાલરને SCમાંથી OBC કેટેગરીમાં ખસેડવાની માંગ લાંબા સમયથી કરવામાં આવી રહી છે. તેમના જણાવ્યા પ્રમાણે અંતિમ લક્ષ્ય સામાન્ય કેટેગરી (General Category)માં જવાનું છે.
કૃષ્ણસામીના જણાવ્યા મુજબ આ માંગ માત્ર આર્થિક સ્થિતિ સાથે જોડાયેલી નથી, પરંતુ સમુદાયની સામાજિક ઓળખ અને આત્મસન્માન સાથે પણ જોડાયેલી છે. તેમના મતે SC તરીકેની ઓળખ સાથે જોડાયેલા સામાજિક કલંકને કારણે સમુદાયના કેટલાક લોકોને શિક્ષણ અને નોકરી ઉપરાંત વેપાર ક્ષેત્રમાં પણ મુશ્કેલીઓનો સામનો કરવો પડે છે.
સમુદાયની ઓળખ અને ઐતિહાસિક પૃષ્ઠભૂમિ
દેવેનદ્રકુલ વેલ્લાલર મુખ્યત્વે તમિલનાડુના દક્ષિણ અને મધ્ય વિસ્તારોમાં વસે છે. સમુદાય સાથે જોડાયેલા લોકો ખેતી અને કૃષિ સાથે સંકળાયેલા હોવાનું તેના પ્રતિનિધિઓ જણાવે છે.
સમુદાયની પોતાની સાંસ્કૃતિક અને ધાર્મિક પરંપરાઓ પણ છે. મદુરાઈના મીનાક્ષી અમ્મન મંદિર સહિત અનેક મંદિરોની પરંપરાઓ સાથે સમુદાયના સંબંધો હોવાનો દાવો કરવામાં આવે છે.
2021ના કાયદાકીય ફેરફારથી અલગ-અલગ નામે નોંધાયેલા છ સમુદાયોને એકીકૃત ઓળખ આપવામાં આવી હતી. આ ફેરફારનો હેતુ એક સંયુક્ત સાંસ્કૃતિક ઓળખને માન્યતા આપવાનો હતો.
અનામતનો લાભ છોડવાની વાત પર મતભેદ
સમુદાયના કેટલાક નેતાઓ કહે છે કે SC કેટેગરીમાંથી બહાર થવાની માંગ આત્મસન્માન અને સામાજિક ઓળખ માટે છે. બીજી તરફ, આ મુદ્દે સમગ્ર સમુદાયમાં એકમત છે કે નહીં તે અંગે ચર્ચા છે.
કેટલાક વિશ્લેષકોના જણાવ્યા પ્રમાણે સમુદાયના એક ભાગને SC અનામતના લાભ ચાલુ રહે તે જરૂરી લાગે છે. ખાસ કરીને ધાર્મિક પરિવર્તન કરેલા લોકોના હિતો અને અનામતના લાભને લઈને પણ અલગ અભિપ્રાયો હોવાનું જણાવવામાં આવે છે.
SC યાદીમાં ફેરફાર કેવી રીતે થાય?
SC યાદીમાં કોઈ સમુદાયને ઉમેરવો કે દૂર કરવો સામાન્ય વહીવટી નિર્ણય નથી. બંધારણની જોગવાઈઓ હેઠળ રાષ્ટ્રપતિ SC યાદી જાહેર કરે છે અને સંસદ કાયદા દ્વારા તેમાં ફેરફાર કરી શકે છે. 2021માં તમિલનાડુની SC યાદીમાં કરવામાં આવેલ ફેરફાર પણ સંસદ દ્વારા કાયદો પસાર કર્યા બાદ થયો હતો.
અટલે દેવેનદ્રકુલ વેલ્લાલરને SC યાદીમાંથી દૂર કરવાની માંગ આગળ વધે તો તેના માટે પણ બંધારણીય અને કાયદાકીય પ્રક્રિયાની જરૂર પડશે.
અનોખી માંગે ફરી શરૂ કરી અનામત પર ચર્ચા
દેવેનદ્રકુલ વેલ્લાલર સમુદાયની માંગ અનામતની ચર્ચામાં અલગ પ્રકારનો મુદ્દો રજૂ કરે છે. જ્યાં એક તરફ વિવિધ સમુદાયો અનામત કેટેગરીમાં સમાવેશ અથવા વધુ લાભની માંગ કરે છે, ત્યાં DKVના કેટલાક નેતાઓ SC ઓળખમાંથી બહાર આવવાની માંગ કરી રહ્યા છે.
આ માંગ પાછળ સામાજિક ઓળખ, આત્મસન્માન, આર્થિક સ્થિતિ અને અનામતના ભવિષ્ય જેવા અનેક મુદ્દાઓ જોડાયેલા છે. અંતે આ માંગને લઈને કાયદાકીય પ્રક્રિયા અને સમુદાયની અંદરના વિવિધ મતો મહત્વપૂર્ણ રહેશે.
