દુનિયામાં ભારતનો ડંકો વગાડનાર 5 રમતવીરો! જાણો મેજર ધ્યાનચંદથી નીરજ ચોપરાની ઐતિહાસિક સફર

15 ઓગસ્ટ એટલે કે સ્વતંત્રતા દિવસ દરેક ભારતીય માટે ગૌરવ, સન્માન અને દેશભક્તિનો ઉત્સવ ઉજવવાનો દિવસ છે. આ વખતે 15 ઓગસ્ટ 2026ના રોજ આપણો દેશ પોતાનો 80મો સ્વતંત્રતા દિવસ ઉજવવા જઈ રહ્યો છે. દેશની આઝાદી અને તિરંગાની શાન માત્ર સરહદો પર ઊભેલા વીરો સુધી જ મર્યાદિત નથી, પરંતુ રમતના મેદાન પર પણ જ્યારે તિરંગો લહેરાય છે અને રાષ્ટ્રગીતની ધૂન વાગે છે, ત્યારે દરેક ભારતીયની છાતી ગૌરવથી પહોળી થઈ જાય છે. આ ખાસ પ્રસંગે તમને ભારતીય રમતગમત જગતના એવા 5 મહાનાયકો વિશે જણાવીશું જેમણે પોતાની રમતથી વિશ્વના નકશા પર ભારતનું નામ હંમેશાં માટે સુવર્ણ અક્ષરોમાં અંકિત કરી દીધું.

હોકીના જાદુગર મેજર ધ્યાનચંદ

જ્યારે ભારત બ્રિટિશ હકુમતની ગુલામીના દોરમાંથી પસાર થઈ રહ્યું હતું, ત્યારે ઓલિમ્પિકના મેદાન પર ભારતના નામનો ડંકો વગાડનાર ખેલાડી હતા મેજર ધ્યાનચંદ. 1928 એમ્સ્ટરડમ, 1932 લોસ એન્જિલસ અને 1936 બર્લિન ઓલિમ્પિકમાં ભારતને સતત ત્રણ ગોલ્ડ મેડલ અપાવવામાં તેમની મહત્વપૂર્ણ ભૂમિકા રહી હતી. બર્લિન ઓલિમ્પિકમાં તો તેમની જાદુઈ રમત જોઈને ખુદ એડોલ્ફ હિટલર પણ હેરાન રહી ગયો હતો. ધ્યાનચંદે બતાવી દીધું કે એક ભારતીય પોતાની રમતથી દુનિયાને કેવી રીતે નતમસ્તક કરી શકે છે.

1983નો એ ઐતિહાસિક મોડ

25 જૂન 1983ની એ તારીખ ભારતીય ક્રિકેટ અને રમતગમતના ઇતિહાસનો સૌથી મોટો મોડ સાબિત થઈ. લોર્ડ્સના ઐતિહાસિક મેદાન પર યુવા કેપ્ટન કટિલ દેવની આગેવાનીમાં ભારતે બે વારની વર્લ્ડ ચેમ્પિયન વેસ્ટ ઇન્ડીઝને હરાવીને પહેલીવાર ક્રિકેટ વર્લ્ડ કપ પોતાના નામે કર્યો હતો. આ જીતે માત્ર ભારતીય ક્રિકેટનો ચહેરો જ ન બદલ્યો, પરંતુ સમગ્ર દેશમાં એ વિશ્વાસ જગાવ્યો કે ભારત પણ ગ્લોબલ લેવલે ચેમ્પિયન બની શકે છે.

અભિનવ બિન્દ્રાનો ઐતિહાસિક ગોલ્ડ

ઓલિમ્પિક રમતોમાં ભારતને વ્યક્તિગત ગોલ્ડ મેડલ માટે દાયકાઓ સુધી લાંબી રાહ જોવી પડી હતી. આ દુકાળને વર્ષ 2008ના બીજિંગ ઓલિમ્પિકમાં 10 મીટર એર રાઇફલ ઇવેન્ટમાં અભિનવ બિન્દ્રાએ ખતમ કર્યો હતો. બિન્દ્રાનું એ નિશાન માત્ર બીજિંગમાં જ નહોતું લાગ્યું, પરંતુ તેણે એક અબજથી વધુ ભારતીયોના મનમાં બેઠેલા એ ડરને દૂર કરી દીધો હતો કે ભારતીયો વ્યક્તિગત રમતોમાં ઓલિમ્પિક ચેમ્પિયન બની શકતા નથી.

6 વારની વર્લ્ડ ચેમ્પિયન મેરી કોમ

મણિપુરના એક નાના ગામમાંથી નીકળીને બોક્સિંગની રિંગમાં વર્લ્ડ ચેમ્પિયન બનવા સુધીની સફર મેરી કોમના જુસ્સાનું ઉદાહરણ છે. 6 વાર વર્લ્ડ બોક્સિંગ ચેમ્પિયનશિપ જીતનારી દુનિયાની એકમાત્ર મહિલા બોક્સર અને 2012 લંડન ઓલિમ્પિકની બ્રોન્ઝ મેડલ વિજેતા મેરી કોમે એ સાબિત કર્યું કે કોઈ પણ સામાજિક કે આર્થિક અવરોધ ભારતીય મહિલાઓના હિંમતને રોકી શકતો નથી.

ટ્રેક એન્ડ ફિલ્ડનો પહેલો ‘ગોલ્ડન બોય’

ટોક્યો 2020 ઓલિમ્પિકમાં જેવલિન થ્રો ઇવેન્ટમાં નીરજ ચોપરાનો 87.58 મીટરનો એ થ્રો ઇતિહાસના પાના પર નોંધાઈ ગયો. તેમણે ભારતને એથ્લેટિક્સના ઇતિહાસમાં પહેલો ઓલિમ્પિક ગોલ્ડ મેડલ અપાવ્યો હતો. આ પછી વર્લ્ડ ચેમ્પિયનશિપ અને એશિયન ગેમ્સમાં પણ સતત સોનું જીતીને નીરજે દુનિયામાં ભારતનું માથું સૌથી ઊંચું રાખ્યું છે.