સાઉદી અરેબિયાના એરપોર્ટ પર હુમલો: 1 ભારતીયનું મોત, 2 ઈજાગ્રસ્ત; એમ્બેસીએ આપી પ્રતિક્રિયા

મિડલ ઈસ્ટમાં ચાલી રહેલો સંઘર્ષ હવે અત્યંત ગંભીર અને ખતરનાક વળાંક પર પહોંચી ગયો છે. સામાન્ય રીતે એરપોર્ટ અને પેસેન્જર ફ્લાઈટ્સ કોઈપણ યુદ્ધ ક્ષેત્રમાં સૌથી સંવેદનશીલ અને સુરક્ષિત ક્ષેત્ર ગણાતા હોય છે. પરંતુ સાઉદી અરેબિયાના મુખ્ય ઈન્ટરનેશનલ એરપોર્ટ અને તેલના કુવાઓ પર થયેલા ઉપરાઉપરી હુમલાઓએ વૈશ્વિક સુરક્ષા વ્યવસ્થા સામે મોટો સવાલ ઊભો કરી દીધો છે. આ સ્થિતિની ગંભીરતા એટલી વધી ગઈ છે કે વૈશ્વિક મહાસત્તા અમેરિકાએ પણ પોતાના અધિકારીઓને તાત્કાલિક અસરથી ત્યાંથી ખસી જવાની સૂચના આપવી પડી છે.

સાઉદી અરેબિયાના પૂર્વીય પ્રાંતના અગ્રણી શહેર દમ્મામમાં આવેલા કિંગ ફહદ ઇન્ટરનેશનલ એરપોર્ટ પર થયેલા હુમલામાં 1 ભારતીય નાગરિકનું કરુણ મોત નીપજ્યું છે, જ્યારે અન્ય 2 ભારતીયો ગંભીર રીતે ઘાયલ થયા છે. આ હુમલામાં કુલ 2 લોકોએ પોતાના જીવ ગુમાવ્યા છે. સાઉદી સરકાર દ્વારા સત્તાવાર જાણકારી મળ્યા બાદ રિયાધ સ્થિત ભારતીય દૂતાવાસે આ ઘટનાની પુષ્ટિ કરી છે અને પ્રભાવિત પરિવારો સાથે સંપર્ક સાધવાની કવાયત તેજ કરી છે.

કિંગ ફહદ ઈન્ટરનેશનલ એરપોર્ટ નિશાના પર: 1 નાગરિકનું મોત, 8 લોકો ઘાયલ

સાઉદી અરેબિયાના પૂર્વીય પ્રાંતમાં આવેલા અને પર્શિયન ગલ્ફ પાસે બહેરીન તેમજ કતારની સરહદ નજીક સ્થિત દમ્મામના જાણીતા 'કિંગ ફહદ ઈન્ટરનેશનલ એરપોર્ટ' પર બુધવારે મોડી રાત્રે અચાનક હુમલો કરવામાં આવ્યો હતો. આ હુમલામાં 1 સાઉદી નાગરિકનું ઘટનાસ્થળે જ મૃત્યુ નીપજ્યું હતું, જ્યારે અન્ય 8 લોકો ગંભીર રીતે ઘાયલ થયા છે. સાઉદી સિવિલ એવિએશન ઓથોરિટીએ ગુરુવારે સવારે અધિકૃત પુષ્ટિ કરતાં જણાવ્યું કે હુમલાના કારણે એરપોર્ટના ઈન્ફ્રાસ્ટ્રક્ચરને પણ નુકસાન પહોંચ્યું છે.

એરસ્પેસમાં અફરાતફરી

ગ્લોબલ ફ્લાઈટ ટ્રેકિંગ સર્વિસ 'Flightradar24' દ્વારા સોશિયલ મીડિયા પ્લેટફોર્મ X પર માહિતી જાહેર કરવામાં આવી હતી કે મધરાતે હુમલા બાદ મુસાફરોની સુરક્ષાને ધ્યાને રાખીને ઘણી આંતરરાષ્ટ્રીય અને સ્થાનિક ફ્લાઈટ્સના રૂટ તાત્કાલિક ડાયવર્ટ કરવામાં આવ્યા હતા. આ વિસ્તાર અગાઉ પણ હૂથી બળવાખોરોની મિસાઈલો અને પ્રોજેક્ટાઈલ હુમલાઓનું નિશાન બની ચૂક્યો છે. જોકે આ તાજા હુમલા અંગે ઈરાન સમર્થિત હૂથી જૂથ તરફથી કોઈ સત્તાવાર નિવેદન આવ્યું નથી, પરંતુ સાઉદી ગઠબંધને જણાવ્યું છે કે તેમણે દેશના પૂર્વીય ક્ષેત્રમાં 4 ડ્રોન હુમલાઓને સફળતાપૂર્વક ઈન્ટરસેપ્ટ કર્યા હતા.

અરામકો ઓઈલ ફિલ્ડ પર ડ્રોન કાટમાળ પડતાં 2નાં મોત: ઘાયલોમાં ભારતીય નાગરિક

એરપોર્ટ પર થયેલા હુમલાના થોડા સમય પહેલાં જ દક્ષિણ-પૂર્વીય સાઉદી અરેબિયામાં વિશ્વની સૌથી મોટી ઓઈલ કંપની 'અરામકો' દ્વારા સંચાલિત શાયબહ ઓઈલ ફિલ્ડ પર ઈન્ટરસેપ્ટ કરાયેલા ડ્રોનનો કાટમાળ પડ્યો હતો.

• આ ઘટનામાં એક કોન્ટ્રાક્ટરના વાહનમાં ભીષણ આગ લાગી ગઈ હતી.
• વાહનમાં સવાર 2 લોકોના મોત થયા હતા, જેમાં 1 નેપાળી અને 1 ફિલિપિનો નાગરિક સામેલ હતા.
• જ્યારે ઈજાગ્રસ્તોમાં ભારતીય અને પાકિસ્તાની નાગરિકોનો સમાવેશ થાય છે.

સાઉદી તેલ ઠેકાણાઓ પર હુમલાઓની વધતી શ્રૃંખલા

• ગયા મહિને પણ હવામાં તોડી પાડવામાં આવેલા હૂથી ડ્રોનનો કાટમાળ પડવાથી સાઉદીમાં રહેતા 1 યમની નાગરિકનું મોત થયું હતું, જે શિપિંગ અને ઓઈલ સાઈટ્સ પર હુમલા શરૂ થયા પછી નાગરિક મોતમાં પ્રથમ ઘટના હતી.
• આ મહિનાની શરૂઆતમાં પણ સાઉદીના પૂર્વીય પ્રાંતમાં હુમલા બાદ અરામકોની એક વહીવટી ઈમારતમાં મર્યાદિત સ્તરે આગ લાગી ચૂકી છે.
• તેલ ઉદ્યોગ અને હવે સિવિલિયન એરપોર્ટ્સ પર સતત થઈ રહેલા આ હુમલાઓ વૈશ્વિક સ્તરે ક્રૂડ ઓઈલ સપ્લાય અને પેસેન્જર સુરક્ષા બંને માટે મોટો પડકાર બની રહ્યા છે.

અમેરિકાનું તાત્કાલિક પગલું: સરકારી કર્મચારીઓ અને પરિવારોને દેશ છોડવા આદેશ

સુરક્ષાની ગંભીર પરિસ્થિતિને ધ્યાનમાં રાખીને વૉશિંગ્ટનથી અમેરિકાના વિદેશ વિભાગે સાઉદી અરેબિયામાં તૈનાત પોતાના નોન-ઈમરજન્સી સરકારી કર્મચારીઓ અને તેમના પરિવારોને તાત્કાલિક અમેરિકા પરત ફરવાનો આદેશ આપ્યો છે. વિદેશ મંત્રાલયે આ સાથે ચેતવણી આપી છે કે હુમલાઓનું આ ક્ષેત્ર હવે સાઉદીની સરહદોથી આગળ વધીને વધુ ફેલાઈ શકે છે.