Canada/ હેલિકોપ્ટર ક્રેશઃ ચાર લોકોનાં મોત, દુર્ઘટનાની તપાસ શરૂ

કેનેડાના મોન્ટ્રીયલ શહેર નજીક શનિવારે એક હેલિકોપ્ટર ક્રેશ થતાં તેમાં સવાર ચારેય લોકોનાં મોત થયા છે. મોન્ટ્રીયલથી લગભગ 50 કિલોમીટર દક્ષિણ-પૂર્વમાં આવેલા સેન્ટ-બ્રિગિડ-ડી’ઇબરવિલે વિસ્તારમાં બપોરે આશરે 2:30 વાગ્યે આ દુર્ઘટના બની હતી. ક્રેશ બાદ હેલિકોપ્ટરમાં આગ લાગી હતી, જેને ફાયર બ્રિગેડે લગભગ એક કલાકમાં કાબૂમાં લીધી હતી. હેલિકોપ્ટર ક્રેશનું ચોક્કસ કારણ હજુ સુધી સામે આવ્યું નથી અને કેનેડાના ટ્રાન્સપોર્ટેશન સેફ્ટી બોર્ડે ઘટનાસ્થળે તપાસકર્તાઓને મોકલ્યા છે.

ક્રેશ પહેલાં હેલિકોપ્ટરમાં આવી હતી મુશ્કેલી

ક્યુબેક પ્રાંતીય પોલીસની પ્રવક્તા ઓડ્રે-એની બિલોડ્યુના જણાવ્યા અનુસાર, હેલિકોપ્ટર ક્રેશ થાય તે પહેલાં તેમાં કેટલીક મુશ્કેલી ઊભી થઈ હતી. જોકે, આ મુશ્કેલીનું ચોક્કસ સ્વરૂપ શું હતું અને તેના કારણે દુર્ઘટના સર્જાઈ કે કેમ તે હજુ સ્પષ્ટ થયું નથી. તપાસ બાદ જ અકસ્માત પાછળનું ચોક્કસ કારણ જાણી શકાશે.

આગ પર એક કલાકમાં કાબૂ, ચારેયનાં મોત

હેલિકોપ્ટર જમીન પર પડ્યા બાદ તેમાં આગ લાગી હતી. ઘટનાની જાણ થતાં ફાયર બ્રિગેડની ટીમ તાત્કાલિક સ્થળે પહોંચી હતી અને આશરે એક કલાકમાં આગ પર કાબૂ મેળવી લીધો હતો. જોકે, હેલિકોપ્ટરમાં સવાર ચારેય લોકોને બચાવી શકાયા નહોતા. ઘટનાસ્થળે જ તેમને મૃત જાહેર કરવામાં આવ્યા હતા.

મૃતકોની ઓળખ હજુ જાહેર કરાઈ નથી

ક્યુબેક પ્રાંતીય પોલીસે દુર્ઘટનામાં મૃત્યુ પામેલા ચારેય લોકોની ઓળખ હજુ સુધી જાહેર કરી નથી. પોલીસ દ્વારા હેલિકોપ્ટર ખાનગી વિમાન હોવાનું પ્રાથમિક અનુમાન વ્યક્ત કરવામાં આવ્યું છે. જોકે, તેની પણ તપાસ ચાલી રહી છે અને સત્તાવાર રીતે વધુ વિગતો બહાર આવવાની બાકી છે.

ટ્રાન્સપોર્ટેશન સેફ્ટી બોર્ડની તપાસ શરૂ

કેનેડાના ટ્રાન્સપોર્ટેશન સેફ્ટી બોર્ડે ઘટનાની ગંભીરતા ધ્યાનમાં લઈને તપાસકર્તાઓને ક્રેશ સ્થળે મોકલ્યા છે. તપાસ દરમિયાન હેલિકોપ્ટરની સ્થિતિ, ઉડાન પહેલાં સર્જાયેલી મુશ્કેલી અને અકસ્માતના સંભવિત કારણોની તપાસ કરવામાં આવશે.

અમેરિકામાં પણ બે હેલિકોપ્ટર ક્રેશ થયા હતા

આ અગાઉ અમેરિકાના યોસેમિટી નેશનલ પાર્કમાં જંગલની આગ સામેની કામગીરી દરમિયાન પાણીનો છંટકાવ કરતી વખતે બે હેલિકોપ્ટર ક્રેશ થયા હતા. આ દુર્ઘટનામાં બંને હેલિકોપ્ટરના પાઇલટનાં મોત થયા હતા. બંને હેલિકોપ્ટરમાં માત્ર પાઇલટ જ સવાર હતા અને તેઓ ‘પ્રિસિઝન’ નામની કોન્ટ્રાક્ટ એરક્રાફ્ટ કંપની માટે કામ કરતા હતા.

આ ઘટનામાં મૃત્યુ પામેલા પાઇલટ્સ પૈકી એક ગ્રેગ કિંગ હતા. તેઓ અગાઉ અલાસ્કાના ફોરેસ્ટ્રી એન્ડ ફાયર પ્રોટેક્શન વિભાગ સાથે જોડાયેલા હતા અને જંગલની આગ બુઝાવવાની કામગીરીમાં પણ સામેલ રહ્યા હતા.