નેપાળમાં વહેલી સવારે ભૂકંપના આંચકા, રિક્ટર સ્કેલ પર 4.9ની તીવ્રતા
ભારતના પડોશી દેશ નેપાળમાં ગુરૂવારે વહેલી સવારે ભૂકંપના આંચકા અનુભવાતા લોકોમાં ભારે અફડાતફડી અને ફફડાટનો માહોલ સર્જાયો હતો. ભારતીય સમયાનુસાર સવારે 4:30 વાગ્યે આવેલા આ ભૂકંપની તીવ્રતા રિક્ટર સ્કેલ પર 4.9 માપવામાં આવી છે.
આંચકા એટલા સ્પષ્ટ હતા કે ઊંઘી રહેલા લોકો ઘરની બહાર દોડી આવ્યા હતા. નેશનલ સેન્ટર ફોર સિસ્મોલોજીના જણાવ્યા અનુસાર, ભૂકંપનું કેન્દ્રબિંદુ જમીનથી 73 કિલોમીટરની ઊંડાઈએ નોંધાયું હતું. હાલમાં આ ભૂકંપના કારણે કોઈ જાનમાલના મોટા નુકસાનના અહેવાલ પ્રાપ્ત થયા નથી, પરંતુ સ્થાનિક પ્રશાસન દ્વારા સ્થિતિ પર સતત નજર રાખવામાં આવી રહી છે.
નોંધનીય છે કે, હિમાલયન બેલ્ટમાં આવેલા નેપાળમાં અવારનવાર ભૂસ્તરશાસ્ત્રીય હલચલના કારણે ભૂકંપના આંચકા આવતા રહે છે. આ અગાઉ 1 નવેમ્બરના રોજ જાપાનમાં પણ 6.0 ની તીવ્રતાનો ભયાનક ભૂકંપ નોંધાયો હતો, જેમાં સદ્નસીબે મોટી દુર્ઘટના ટળી હતી. પૃથ્વીના પેટાળમાં રહેલી ટેક્ટોનિક પ્લેટોની સતત ધીમી ગતિવિધિ અને એકબીજા સાથેના ઘર્ષણથી ઉદ્ભવતી પ્રચંડ ઉર્જા જ્યારે અચાનક બહાર આવે છે, ત્યારે આવી કંપનની ઘટનાઓ બને છે.
વિજ્ઞાનીઓના જણાવ્યા મુજબ, રિક્ટર સ્કેલ પર 4.5 કે તેથી વધુ તીવ્રતા ધરાવતો ભૂકંપ મકાનો અને કાચા બાંધકામોને નુકસાન પહોંચાડવાની ક્ષમતા ધરાવે છે, જ્યારે 7.0થી વધુ તીવ્રતાના ભૂકંપ અત્યંત વિનાશક સાબિત થાય છે. નેપાળમાં આવેલા આ આંચકા બાદ વહીવટી તંત્ર દ્વારા સંભવિત આફ્ટરશૉક્સને ધ્યાનમાં રાખીને સુરક્ષાના ભાગરૂપે લોકોને સાવચેત રહેવાની સલાહ આપવામાં આવી છે.
