Video: નેપાળમાં 4.9ની તીવ્રતાના ભૂકંપના આંચકા

ભારતના પડોશી દેશ નેપાળમાં આજે વહેલી સવારે ભૂકંપના આંચકા અનુભવાતા લોકોમાં ભારે ભયનો માહોલ સર્જાયો હતો. ભારતીય સમય મુજબ સવારે સાડા ચાર વાગ્યે આવેલા આ ભૂકંપની તીવ્રતા રિક્ટર સ્કેલ પર 4 પોઈન્ટ 9 જેટલી ઉંચી માપવામાં આવી છે. આંચકા એટલા સ્પષ્ટ હતા કે ઊંઘી રહેલા લોકો ઘરની બહાર દોડી આવ્યા હતા. નેશનલ સેન્ટર ફોર સિસ્મોલોજીના જણાવ્યા અનુસાર, ભૂકંપનું કેન્દ્રબિંદુ જમીનથી 73 કિલોમીટરની ઊંડાઈએ નોંધાયું હતું. હાલમાં આ ભૂકંપના કારણે કોઈ જાનમાલના મોટા નુકસાનના અહેવાલ પ્રાપ્ત થયા નથી, પરંતુ સ્થાનિક પ્રશાસન દ્વારા સ્થિતિ પર સતત નજર રાખવામાં આવી રહી છે. આ આંચકા બાદ વહીવટી તંત્ર દ્વારા સંભવિત આફ્ટરશૉક્સને ધ્યાનમાં રાખીને સુરક્ષાના ભાગરૂપે લોકોને સાવચેત રહેવાની સલાહ આપવામાં આવી છે.નોંધનીય છે કે, હિમાલયન બેલ્ટમાં આવેલા નેપાળમાં અવારનવાર ભૂસ્તરશાસ્ત્રીય હલચલના કારણે ભૂકંપના આંચકા આવતા રહે છે. પૃથ્વીના પેટાળમાં રહેલી ટેક્ટોનિક પ્લેટોની સતત ધીમી ગતિવિધિ અને એકબીજા સાથેના ઘર્ષણથી ઉદભવતી પ્રચંડ ઉર્જા જ્યારે અચાનક બહાર આવે છે, ત્યારે આવી કંપનની ઘટનાઓ બને છે