ઈઝરાયલ સંસદ ત્રિશંકુ: માત્ર 8 બેઠકો માટે નેતન્યાહુ કરશે મોટો ખેલ કે આરબ પક્ષો બનશે કિંગમેકર?!

ઈઝરાયલની 120 બેઠકોવાળી સંસદમાં સરકાર રચવા જરૂરી 61 બેઠકો કોઈ પણ પક્ષને ન મળતાં રાજકીય મડાગાંઠ સર્જાઈ છે. અંદાજ મુજબ વડાપ્રધાન બેન્જામિન નેતન્યાહુના દક્ષિણપંથી જૂથને 53, ગાદી આઈઝેનકોટના વિપક્ષી જૂથને 48 અને આરબ પક્ષોને 19 બેઠકો મળી છે. ત્રિશંકુ પરિસ્થિતિ વચ્ચે સત્તા રચવા હવે માત્ર 3 વિકલ્પો બાકી છે:

વિકલ્પ 1 : નેતન્યાહુ અને આઈઝેનકોટની એકતા સરકાર

નેતન્યાહુ વિપક્ષી નેતા આઈઝેનકોટ સાથે રોટેશન પદ્ધતિથી (બે-બે વર્ષ વડાપ્રધાન પદ) અથવા આઈઝેનકોટને મહત્વનું મંત્રાલય આપીને 'રાષ્ટ્રીય એકતા સરકાર' બનાવવાનો પ્રયાસ કરી રહ્યા છે. જોકે, વિચારધારાના તફાવતો અને સેના ભરતી વિવાદ વચ્ચે આઈઝેનકોટે હજુ કોઈ સંમતિ દર્શાવી નથી.

વિકલ્પ 2 : આરબ પક્ષોનું સમર્થન

19 બેઠકો ધરાવતા આરબ પક્ષો કિંગમેકરની ભૂમિકામાં છે. વિપક્ષી જૂથ (48) તેમની સાથે મળીને 67 બેઠકો સાથે આસાનીથી બહુમતી સાબિત કરી શકે છે, પરંતુ રાજકીય જોખમોને કારણે નેતન્યાહુ કે આઈઝેનકોટ બંને ભૂતકાળમાં આરબ પક્ષોના ટેકાવાળી સરકારનો ઈનકાર કરી ચૂક્યા છે.

વિકલ્પ 3 : પક્ષપલટો કરાવીને બહુમતી

નેતન્યાહુને સરકાર રચવા માત્ર 8 બેઠકો ખૂટે છે. તેઓ વિપક્ષના અસંતુષ્ટ કે મધ્યમમાર્ગી સાંસદોને હોદ્દાની લાલચ આપી પોતાના જૂથમાં લાવી બહુમતી ઊભી કરવાનો પ્રયાસ કરી શકે છે.

જો ત્રણેય વિકલ્પો નિષ્ફળ જાય તો દેશમાં ફરી ચૂંટણી

રાષ્ટ્રપતિ આઈઝેક હર્ઝોગ સત્તાવાર પરિણામો આવ્યા બાદ તમામ પક્ષો સાથે ચર્ચા કરીને નક્કી કરશે કે સરકાર રચવાની પ્રથમ તક કોને આપવી. જ્યાં સુધી કોઈ ઉકેલ ન આવે ત્યાં સુધી નેતન્યાહુ કાર્યવાહક વડાપ્રધાન તરીકે યથાવત રહેશે. જો ઉપરોક્ત ત્રણેય વિકલ્પોમાંથી કોઈ પણ ફોર્મ્યુલા સફળ નહીં થાય, તો ઈઝરાયલને ટૂંક સમયમાં ફરી એકવાર નવી સામાન્ય ચૂંટણીનો સામનો કરવો પડશે. હાલમાં કોઈ પણ જૂથ પાસે સત્તા સુધી પહોંચવાનો સ્પષ્ટ રસ્તો ન હોવાથી એકતા સરકારનો પ્રસ્તાવ અને આરબ પક્ષોની ભૂમિકા રાજકીય ચર્ચાના કેન્દ્રમાં છે.