બ્રાઝિલમાં લુલા દા સિલ્વાનો વિજય: ટ્રમ્પના સમર્થિત જમણેરી નેતા બોલ્સોનારોને હરાવી ફરી પ્રમુખપદે!

બ્રાઝિલની રાષ્ટ્રપતિ ચૂંટણીમાં ડાબેરી ઝુકાવ ધરાવતા સત્તાધારી નેતા લુઈઝ ઈનાસિયો લુલા દા સિલ્વાએ જમણેરી નેતા ફ્લાવિયો બોલ્સોનારોને હરાવી ફરી જીત મેળવી હોવાનો અહેવાલ છે. ટ્રમ્પના નજીકના ગણાતા બોલ્સોનારો સામેની આ ચૂંટણીમાં લુલાને 51.75 ટકા મત મળ્યા હતા, જ્યારે બોલ્સોનારોને 48.25 ટકા મત મળ્યાનો દાવો કરવામાં આવ્યો છે. દક્ષિણ અમેરિકાના અનેક દેશોમાં જમણેરી રાજકીય વલણ મજબૂત બની રહ્યું છે ત્યારે લુલાની જીતને નોંધપાત્ર માનવામાં આવી રહી છે.

જમણેરી રાજકીય લહેર વચ્ચે લુલાની જીત

આર્જેન્ટિના, ચિલી, કોલંબિયા અને પેરુ જેવા દક્ષિણ અમેરિકાના દેશોમાં જમણેરી રાજકારણનો પ્રભાવ વધી રહ્યો છે. આવા રાજકીય માહોલમાં લુલા દા સિલ્વાની જીત તેમના સમર્થકો માટે મહત્ત્વપૂર્ણ માનવામાં આવે છે. ચૂંટણીમાં તેમના પ્રતિસ્પર્ધી બોલ્સોનારોને અમેરિકાના રાષ્ટ્રપતિ ડોનાલ્ડ ટ્રમ્પના સમર્થક તરીકે ઓળખાવવામાં આવ્યા હતા. ચૂંટણી દરમિયાન ભારે વરસાદને કારણે મતદાન મથકો સુધી પહોંચતી કેટલીક બસોને રસ્તામાં રોકાવું પડ્યું હતું, જેના કારણે મતદાન પ્રક્રિયામાં વિક્ષેપ પડ્યો હતો. બોલ્સોનારો પર મતદાન ઓછું થાય તે હેતુથી બસો મોડી કરાવવાનો આક્ષેપ પણ થયો હતો. જોકે, અહેવાલ મુજબ તેમણે પોતે જ સુપ્રીમ કોર્ટ સમક્ષ મતદાનનો સમય બે કલાક વધારવાની માગ કરી હતી, જેને મંજૂરી આપવામાં આવી હતી.

નબળી અર્થવ્યવસ્થા અને અપરાધી જૂથો મોટો પડકાર

ચૂંટણી વિશ્લેષકોના મતે, સત્તામાં પાછા ફર્યા બાદ લુલા સામે અનેક પડકારો ઊભા રહેશે. બ્રાઝિલમાં આર્થિક વિકાસની ગતિ ધીમી હોવાનું અને જીડીપી વૃદ્ધિ અંગે ચિંતાઓ હોવાનું જણાવાયું છે. આર્થિક સ્થિતિ સુધારવા ઉપરાંત તેમને જમણેરી બહુમતી ધરાવતી સંસદ સાથે પણ કામ કરવું પડશે. દેશમાં સંગઠિત અપરાધી જૂથોની વધતી તાકાત પણ સરકાર માટે ગંભીર પડકાર છે. કેટલાક વિસ્તારોમાં આ જૂથોનો પ્રભાવ અને ભય વધતો હોવાના અહેવાલો વચ્ચે કાયદો અને વ્યવસ્થા મજબૂત બનાવવી લુલા સરકાર માટે મહત્ત્વપૂર્ણ રહેશે.

ટ્રમ્પના દબાણ સામે લુલાની નીતિની કસોટી

લુલા સામેનો બીજો પડકાર અમેરિકા સાથેના સંબંધોનો છે. વેપાર, અર્થતંત્ર અને રાજકીય મુદ્દાઓ પર ટ્રમ્પ પ્રશાસનના દબાણનો સામનો કરવાની લુલાએ વાત કરી હતી. તેમણે ચૂંટણી પ્રચાર દરમિયાન એવો સંદેશ આપ્યો હતો કે તેમના પ્રતિસ્પર્ધી અમેરિકાના પ્રભાવ હેઠળ દેશ ચલાવવા માગે છે. હવે ચૂંટણીમાં મળેલી જીત બાદ લુલા માટે બ્રાઝિલની સ્વતંત્ર વિદેશ નીતિ જાળવવી, અર્થવ્યવસ્થાને વેગ આપવો અને અપરાધી જૂથો પર અંકુશ મેળવવો મહત્ત્વપૂર્ણ રહેશે.