VIDEO: પૌડી ગઢવાલમાં જીવના જોખમે શિક્ષણ

પૌડી ગઢવાલમાં જીવના જોખમે શિક્ષણ

શાળાના રસ્તે જોખમી ઝાડ સામે બાળકોનું હલ્લાબોલ!

બી.આર. મોડર્ન સ્કૂલના બાળકો રસ્તા પર

ઉત્તરાખંડના પૌડી ગઢવાલ જિલ્લામાં વિદ્યાર્થીઓની સુરક્ષા સામે મોટો ખતરો ઊભો થતાં શાળાના બાળકો રસ્તા પર ઉતરી આવ્યા છે. બી.આર. મોડર્ન સ્કૂલ તરફ જતા મુખ્ય માર્ગ પર આવેલા સુકાઈ ગયેલા અને જોખમી બનેલા ઝાડને કારણે ગમે ત્યારે મોટી હોનારત સર્જાવાની દહેશત વ્યાપી છે. વિદ્યાર્થીઓ અને શિક્ષકો દ્વારા આ જોખમી ઝાડોને તાત્કાલિક હટાવવાની માંગ સાથે સખત વિરોધ પ્રદર્શન કરવામાં આવ્યું હતું, જેના કારણે સમગ્ર વિસ્તારમાં તંત્રની કામગીરી સામે ગંભીર સવાલો ઊભા થયા છે. વિરોધ પ્રદર્શન દરમિયાન સામે આવેલા દ્રશ્યોમાં બાળકો પોતાના જીવના રક્ષણ માટે હાથમાં બેનરો લઈને સૂત્રોચ્ચાર કરતા નજરે પડી રહ્યા છે. બી.આર. મોડર્ન સ્કૂલના પ્રિન્સિપાલ દામોદર મમગાઈએ પોતાની પ્રતિક્રિયા આપતાં જણાવ્યું હતું કે શાળાએ આવતા-જતા નાના બાળકો પર આ જોખમી ડાળખીઓ કે ઝાડ ગમે ત્યારે ધરાશાયી થઈ શકે છે. તેમણે ઉમેર્યું કે ચોમાસાની ઋતુમાં ભૂસ્ખલન અને ભારે પવનને લીધે આ વૃક્ષો વધુ જોખમી બન્યાં છે, જેનાથી બાળકો અને વાલીઓમાં સતત ભયનો માહોલ રહે છે.

પહાડી માર્ગો પર આફતનું જોખમ

મોટી દુર્ઘટના સર્જાય તે પહેલાં તંત્ર જાગે તેવી માંગ

આ મામલે પૌડી ગઢવાલના ડીએફઓ મહાતિમ યાદવે પોતાની પ્રતિક્રિયા આપતાં સ્થાનિકો અને શાળા પ્રશાસનને ખાતરી આપી છે. તેમણે સ્પષ્ટ કર્યું કે વન વિભાગ દ્વારા આ માર્ગ પર આવેલા તમામ જોખમી ઝાડોનું નિરીક્ષણ હાથ ધરવામાં આવ્યું છે. જે ઝાડ મુસાફરો અને વિદ્યાર્થીઓ માટે ખતરો બની રહ્યા છે, તેને નિયમાનુસાર કાપવા અથવા કટિંગ કરવાની પ્રક્રિયા યુદ્ધના ધોરણે પૂરી કરવામાં આવશે જેથી કોઈ પણ અપ્રિય દુર્ઘટના અટકાવી શકાય. ચોમાસાના સમયમાં પહાડી વિસ્તારોમાં ઝાડ ધરાશાયી થવાની ઘટનાઓ સામાન્ય બનતી હોય છે, ત્યારે સમયસર પગલાં લેવાં અત્યંત જરૂરી છે. જો વન વિભાગ દ્વારા તાત્કાલિક ધોરણે આ સુકાઈ ગયેલાં વૃક્ષોને હટાવવામાં નહીં આવે તો મોટો અકસ્માત સર્જાઈ શકે છે. હાલ તો વિદ્યાર્થીઓના આ વિરોધ પ્રદર્શન બાદ વહીવટી તંત્ર હરકતમાં આવ્યું છે અને વન વિભાગ ઝડપથી કાર્યવાહી કરશે તેવી ખાતરી આપવામાં આવી છે.

બ્યૂરો રિપોર્ટ જીએસટીવી