VIDEO: જ્યાં સુધી 5 મુખ્ય શરતો પૂરી નહીં થાય, ત્યાં સુધી પરમાણુ ડીલ પર કોઈ ચર્ચા નહીં- ઈરાન

ઈરાન અને અમેરિકા વચ્ચે પરમાણુ કાર્યક્રમને લઈને ચાલી રહેલો વિવાદ હવે નિર્ણાયક વળાંક પર પહોંચ્યો છે. ઈરાને સ્પષ્ટ કર્યું છે કે જ્યાં સુધી તેની 5 મુખ્ય શરતો પૂરી કરવામાં નહીં આવે, ત્યાં સુધી તે પરમાણુ ડીલ પર કોઈ પણ પ્રકારની ચર્ચાને આગળ વધારશે નહીં. ઈરાનની સૌથી પહેલી અને મોટી શરત એ છે કે તમામ મોરચે ચાલી રહેલા યુદ્ધનો તાત્કાલિક અંત લાવવામાં આવે. આ ઉપરાંત, ઈરાને તેના પર લાદવામાં આવેલા તમામ આર્થિક પ્રતિબંધો હટાવવાની અને વિદેશી બેન્કોમાં ફ્રીઝ કરવામાં આવેલી તેની અબજોની સંપત્તિને મુક્ત કરવાની માંગ કરી છે. તેહરાને અમેરિકા સામે એવી પણ માંગણી કરી છે કે યુદ્ધ દરમિયાન ઈરાનને જે કંઈ પણ આર્થિક નુકસાન થયું છે, અમેરિકાએ તેની સંપૂર્ણ ભરપાઈ કરવી પડશે. જોકે, સૌથી મોટો પેચ 'સ્ટ્રેટ ઓફ હોર્મુઝ'ને લઈને ફસાયો છે. ઈરાન ઈચ્છે છે કે આ મહત્ત્વના દરિયાઈ માર્ગ પર તેના સાર્વભૌમ અધિકારને સ્વીકારવામાં આવે. આ એક એવી માંગ છે જેનાથી બંને દેશો વચ્ચે ખેંચતાણ વધી શકે છે, કારણ કે આ રસ્તો વૈશ્વિક ઓઇલ વેપાર માટે અત્યંત મહત્ત્વનો છે. 28 ફેબ્રુઆરીએ અમેરિકા અને ઈઝરાયલ દ્વારા ઈરાનના પરમાણુ કાર્યક્રમને નિશાન બનાવીને હુમલા શરૂ કરવામાં આવ્યા હતા. ઈરાન પોતાના વલણ પર અડગ રહેતા સમાધાનની શક્યતા દેખાતી નથી.