VIDEO: રવિન્દ્ર જાડેજા પાસે કપિલ દેવના ખાસ ક્લબમાં જોડાવાની છે તક, શ્રીલંકા સામે કરવું પડશે આ કામ

ભારતીય ક્રિકેટના સૌથી વિશ્વસનીય ઓલરાઉન્ડર્સમાંથી એક રવિન્દ્ર જાડેજા શ્રીલંકા પ્રવાસ પર ફક્ત તેની ટીમને જીતવામાં મદદ કરવા માટે જ નહીં, પરંતુ એક ઐતિહાસિક રેકોર્ડ બનાવવા માટે પણ જશે. જો જાડેજા બે મેચની ટેસ્ટ સિરીઝમાં ફક્ત બે વધુ વિકેટ લે છે, તો તે ભારતીય ક્રિકેટ દિગ્ગજ કપિલ દેવના ખૂબ જ ખાસ ક્લબમાં જોડાશે. જાડેજા આ સિદ્ધિ મેળવનાર પ્રથમ ભારતીય સ્પિન ઓલરાઉન્ડર બનશે.

કપિલ દેવના ક્લબમાં પ્રવેશ

36 વર્ષીય જાડેજાના નામે હાલમાં 89 ટેસ્ટ મેચોમાં 348 વિકેટ છે, સાથે 4095 રન છે. એકવાર તે 350 વિકેટનો આંકડો પાર કરી લેશે, તો તે ટેસ્ટ ક્રિકેટમાં 4000થી વધુ રન બનાવનાર અને 350 વિકેટ લેનાર પ્રથમ ભારતીય સ્પિન ઓલરાઉન્ડર બનશે. અત્યાર સુધી, આ સિદ્ધિ ફક્ત દિગ્ગજ ઓલરાઉન્ડર કપિલ દેવ પાસે છે. કપિલે પોતાની ટેસ્ટ કારકિર્દીમાં 5,248 રન બનાવ્યા અને 434 વિકેટ લીધી. જોકે, તે ફાસ્ટ બોલિંગ ઓલરાઉન્ડર હતો, જ્યારે જાડેજા આ સીમાચિહ્ન સુધી પહોંચનાર પ્રથમ ભારતીય સ્પિન ઓલરાઉન્ડર બનશે. આ જ કારણ છે કે શ્રીલંકા પ્રવાસ દરમિયાન ક્રિકેટ ફેન્સ તેના દરેક બોલ અને દરેક વિકેટ પર નજર રાખશે. ટેસ્ટ ક્રિકેટના ઈતિહાસમાં, ફક્ત ત્રણ ખેલાડીઓએ 4,000 રન બનાવવા અને 350 વિકેટ લેવાની ડબલ સિદ્ધિ હાંસલ કર્યો છે. આમાં કપિલ દેવ, ઈયાન બોથમ અને ડેનિયલ વેટોરીનો સમાવેશ થાય છે.

જાડેજાની ટેસ્ટ કારકિર્દી પણ એક પ્રેરણાદાયી વાર્તા રહી છે. તેણે 2012માં ઈંગ્લેન્ડ સામે ટેસ્ટ ડેબ્યુ કર્યું હતું. શરૂઆતના વર્ષોમાં, તે ટીમમાં પોતાનું સ્થાન મજબૂત કરવામાં અસમર્થ રહ્યો હતો અને ઘણી વખત તેને બહાર કરવામાં આવ્યો હતો. જોકે, 2015-16 સિઝનમાં તેણે જોરદાર વાપસી કરી અને ક્યારેય પાછળ વળીને ન જોયું.

ટેસ્ટમાં ક્ષમતા સાબિત કરી ચૂક્યો છે

સમય જતાં, જાડેજાએ તેની બેટિંગમાં પણ સુધારો કર્યો છે. આ જ કારણ છે કે તે લાંબા સમયથી ભારતીય ટેસ્ટ ટીમ માટે સૌથી વિશ્વસનીય સ્પિન બોલિંગ ઓલરાઉન્ડર રહ્યો છે. ટેસ્ટ ક્રિકેટમાં, તેણે છ સદી, 28 અડધી સદી, 15 વખત પાંચ વિકેટ અને ત્રણ વખત 10 વિકેટ ઝડપી છે. ઘરેલુ ક્રિકેટમાં, તેણે રણજી ટ્રોફીમાં ત્રણ ત્રેવડી સદી પણ ફટકારી છે, જે તેની બેટિંગ કુશળતા સાબિત કરે છે. 2024માં T20 વર્લ્ડ કપ જીતનાર ભારતીય ટીમનો ભાગ રહેલા જાડેજાએ ટાઈટલ જીત્યા પછી T20I ક્રિકેટમાંથી નિવૃત્તિ લીધી હતી. હાલમાં, તે ટેસ્ટ અને ODI ક્રિકેટમાં સક્રિય છે. હવે જોવાનું એ રહે છે કે શું જાડેજા શ્રીલંકા પ્રવાસ પર આ ઐતિહાસિક સિદ્ધિ હાંસલ કરી શકે છે.