VIDEO: શિલોંગના બુલ્સ ટ્રેક પર સુંદર પહાડો અને ઝરણાં વચ્ચે પ્રવાસીઓનો જમાવડો!

મેઘાલયની રાજધાની અને પૂર્વનું સ્કોટલેન્ડ તરીકે ઓળખાતા શિલોંગમાં પ્રકૃતિપ્રેમીઓ અને સાહસિક પ્રવાસીઓ માટે બુલ્સ ટ્રેક આકર્ષણનું મુખ્ય કેન્દ્ર બન્યો છે. પહાડોની સુંદર હારમાળા, ચારેકોર પથરાયેલી હરિયાળી અને કલકલ વહેતા કુદરતી ઝરણાં વચ્ચે સ્થિત આ ટ્રેક પર હાલ મોટી સંખ્યામાં પ્રવાસીઓ ઉમટી રહ્યા છે. શિલોંગના આ મનોરમ્ય વાતાવરણમાં પ્રવાસીઓ કુદરતના ખોળે ટ્રેકિંગનો અનોખો આનંદ માણી રહ્યા છે. કુદરતી સૌંદર્યથી ભરપૂર આ પહાડી વિસ્તારમાં ટ્રેકિંગ દરમિયાન પ્રવાસીઓને લીલાછમ જંગલો, પહાડી માર્ગો અને શુદ્ધ વાતાવરણનો અદ્ભુત અનુભવ મળી રહ્યો છે. પ્રવાસીઓના જણાવ્યા મુજબ, શહેરની ભાગદોડ અને પ્રદૂષણથી દૂર પ્રકૃતિની ગોદમાં શાંતિ મેળવવા માટે આ એક ઉત્તમ સ્થળ છે. ટ્રેકિંગ રૂટ પરથી દેખાતા વહેતા ઝરણાં અને ધુમ્મસભર્યા પહાડી દ્રશ્યો પ્રવાસીઓનું મન મોહી લે છે. અહીં આવતા દેશ-વિદેશના પ્રવાસીઓ આ નયનરમ્ય નજારાઓને પોતાના કેમેરામાં કેદ કરતા અને આહલાદક ક્ષણો માણતા નજરે પડે છે.

સ્થાનિક પ્રવાસન ઉદ્યોગ માટે પણ આ ટ્રેક અત્યંત મહત્વનો સાબિત થઈ રહ્યો છે, કારણ કે મોટી સંખ્યામાં આવતા પ્રવાસીઓને લીધે સ્થાનિક લોકોને રોજગારીની નવી તકો મળી રહી છે. પ્રશાસન દ્વારા પણ પ્રવાસીઓની સુરક્ષા અને સુવિધા માટે જરૂરી વ્યવસ્થા કરવામાં આવી છે. પ્રકૃતિ અને સાહસના અનોખા સંગમ જેવા આ બુલ્સ ટ્રેકની મુલાકાત લીધા બાદ પ્રવાસીઓ અત્યંત ઉત્સાહિત અને મંત્રમુગ્ધ જોવા મળી રહ્યા છે.

બ્યૂરો રિપોર્ટ જીએસટીવી