VIDEO: ANDARNI VAAT / દિલ્હીમાં થોડા જ વરસાદમાં તંત્રની પોલ ખૂલી: દક્ષિણપુરીમાં ચારેકોર જળબંબાકાર!

દેશની રાજધાની દિલ્હીમાં માત્ર થોડીવાર પડેલા વરસાદે જ તંત્રના તમામ દાવાઓની પોલ ખોલી નાખી છે અને સમગ્ર દિલ્હીના અનેક વિસ્તારોમાં વ્યાપક જળબંબાકારની પરિસ્થિતિ સર્જાઈ હતી. ખાસ કરીને દક્ષિણપુરી વિસ્તાર અને મહેરૌલી-બદરપુર રોડ પર માત્ર થોડા જ સમયના વરસાદ બાદ માર્ગો તળાવમાં ફેરવાઈ ગયા હતા. રસ્તાઓ પર ઘૂંટણસમા પાણી ભરાઈ જવાના કારણે વાહનવ્યવહાર સંપૂર્ણપણે ખોરવાઈ ગયો હતો. ઓટો-રિક્ષા સહિત અનેક નાના-મોટા વાહનો પાણીમાં બંધ પડી જતાં વાહનચાલકો અને મુસાફરોને ભારે હાલાકી ભોગવવી પડી હતી દિલ્હીના આ મુખ્ય માર્ગો પર સર્જાયેલા ભારે ટ્રાફિક જામના કારણે નોકરિયાતો અને સામાન્ય નાગરિકો કલાકો સુધી કાદવ-કીચડ અને ભરાયેલા પાણી વચ્ચે ફસાયેલા રહ્યા હતા. ડ્રેનેજ સિસ્ટમની નબળી સ્થિતિના કારણે થોડાક જ વરસાદમાં જળબંબાકાર થતાં દિલ્હીવાસીઓનું રોજિંદુ જનજીવન ભારે મુશ્કેલીમાં મુકાઈ ગયું હતું..

દિલ્હીના દક્ષિણપુરી જેવા ગીચ વિસ્તારોમાં વરસાદી પાણીના નિકાલ માટેની યોગ્ય વ્યવસ્થાના અભાવે પાણી નીચાણવાળા વિસ્તારો અને દુકાનોમાં પણ પ્રવેશ્યા હતા. તો બીજી તરફ માર્ગો પર સતત ભરાઈ રહેતા પાણીના લીધે સ્થાનિક તંત્ર અને વહીવટી માળખા સામે લોકોમાં ભારે અસંતોષ અને રોષની લાગણી જોવા મળી રહી છે. ચોમાસાની શરૂઆતમાં જ સર્જાતી આ પ્રકારની ગંભીર સમસ્યાઓને કારણે વાહનચાલકો માટે રસ્તાઓ પરથી પસાર થવું જોખમી બની ગયું છે. ટ્રાફિક પોલીસ દ્વારા માર્ગો પરથી વાહનોને સુરક્ષિત રીતે પસાર કરાવવા પ્રયાસો કરવામાં આવી રહ્યા છે, છતાં પણ પાણીનો ઝડપી નિકાલ ન થતાં વાહનવ્યવહારની ગતિ અત્યંત ધીમી પડી છે. દિલ્હીના આ પ્રમુખ વિસ્તારોમાં થોડા જ વરસાદે માળખાકીય સુવિધાઓની નબળાઈ છતી કરી દીધી છે, જેનાથી સામાન્ય નાગરિકોને અવરજવર માટે ભારે આકરો સંઘર્ષ કરવો પડી રહ્યો છે..

બ્યૂરો રિપોર્ટ જીએસટીવી