VIDEO: કેન્દ્રની ₹1,500 કરોડની આપત્તિ સહાયની અમે દોઢ વર્ષથી જોઈ રહ્યા છીએ રાહ : હિમાચલના CM સુખવિંદર સિંહ સુક્ખુ

હિમાચલ પ્રદેશમાં કુદરતી હોનારતો બાદ રાહત અને પુનર્વસન માટે કેન્દ્ર સરકાર તરફથી જાહેર કરાયેલા ફંડ મુદ્દે મુખ્યમંત્રી સુખવિંદર સિંહ સુક્ખુએ મહત્વનું નિવેદન આપ્યું છે. ચંદીગઢ ખાતે પત્રકારો સાથે વાતચીત દરમિયાન મુખ્યમંત્રીએ જણાવ્યું હતું કે કેન્દ્ર સરકારે આપત્તિ સહાય પેટે ₹1,500 કરોડ આપવાની જાહેરાત કરી હતી, પરંતુ રાજ્ય સરકાર છેલ્લા દોઢ વર્ષથી આ ભંડોળ મળવાની રાહ જોઈ રહી છે.

રાજ્ય પોતાના સંસાધનોથી કરી રહ્યું છે ખર્ચ 

મુખ્યમંત્રી સુખવિંદર સિંહે સ્પષ્ટ કર્યું હતું કે આપત્તિની સ્થિતિમાં લોકોની સુરક્ષા અને પુનઃનિર્માણ માટે રાજ્ય સરકાર કેન્દ્રના ફંડની રાહ જોઈને બેસી રહી નથી. તેમણે કહ્યું, "જ્યારે પણ કોઈ આપત્તિ આવે છે, ત્યારે અમે વ્યૂહાત્મક રીતે અમારા પોતાના રાજ્ય ભંડોળમાંથી જ જરૂરી ખર્ચ કરીએ છીએ. અમે પરિસ્થિતિને થાળે પાડવા માટે સંપૂર્ણ સક્રિય છીએ, છતાં કેન્દ્ર તરફથી જે ₹1,500 કરોડની સહાય જાહેર કરવામાં આવી હતી તે સમયસર મળી રહે તેની અમે આશા રાખી રહ્યા છીએ."

વિલંબ સામે ઉઠ્યા સવાલો

હિમાચલ પ્રદેશમાં ચોમાસા દરમિયાન ભૂસ્ખલન, વાદળ ફાટવા અને પૂરના કારણે મોટા પાયે માળખાગત સુવિધાઓ તેમજ સામાન્ય જનજીવનને નુકસાન પહોંચ્યું હતું. આ નુકસાનની ભરપાઈ અને રાહત કાર્યો માટે કેન્દ્ર સરકારે વિશેષ આર્થિક પેકેજની જાહેરાત કરી હતી. જોકે, મુખ્યમંત્રીના જણાવ્યા અનુસાર લાંબો સમય વીતી જવા છતાં હજુ સુધી આ રકમ રાજ્યને મળી નથી, જેને લઈને વહીવટી વર્તુળો અને રાજકારણમાં ચર્ચા તેજ બની છે.

રાજ્ય સરકારે આ ભંડોળ વહેલી તકે રીલીઝ કરવામાં આવે તેવી અપેક્ષા વ્યક્ત કરી છે જેથી લાંબા ગાળાના પુનર્વસન પ્રોજેક્ટ્સને વધુ વેગ આપી શકાય.