ENG vs AUS / માત્ર 28 બોલમાં 5 વિકેટ... માહલી બીયર્ડમેનનું વિસ્ફોટક ડેબ્યુ, 38 વર્ષ બાદ થયું આ કારનામું
ઓસ્ટ્રેલિયા અને ઈંગ્લેન્ડ વચ્ચેની ત્રણ મેચની ODI સિરીઝની પહેલી મેચ ઈંગ્લેન્ડના બેટ્સમેન માટે દુઃસ્વપ્ન સાબિત થઈ છે. પર્થમાં ટોસ હારીને પહેલા બેટિંગ કરવા ઉતરનાર ઈંગ્લેન્ડ 21 વર્ષીય ઓસ્ટ્રેલિયન ફાસ્ટ બોલર માહિલ બીયર્ડમેનની ઝડપી અને સચોટ સીમ બોલિંગ સામે સંપૂર્ણપણે નિષ્ફળ ગયું. પોતાની પહેલી ODI મેચ રમતા બીયર્ડમેને માત્ર 28 બોલમાં 5 વિકેટ લઈને સનસનાટી મચાવી દીધી.
બીયર્ડમેનની ગતિએ ઈંગ્લેન્ડની કમર તોડી નાખી
21 વર્ષીય ફાસ્ટ બોલરે પોતાની ચોક્કસ લાઈન, લેન્થ અને એક્સ્ટ્રા બાઉન્સથી ઈંગ્લેન્ડના મહાન બેટ્સમેનોને સ્થિર થવાની કોઈપણ તક ન આપી. તેણે ઈંગ્લેન્ડના કેપ્ટન હેરી બ્રુકને પોતાનો પ્રથમ ODI શિકાર બનાવ્યો. 141 કિમી/કલાકની ઝડપે ફેંકાયેલી ગૂડ લેન્થની બોલ બ્રુકના બેટની બહારની ધારને લાગી, જેને વિકેટકીપરએ સરળતાથી પકડી લીધી. ત્યારબાદ માહિલ બીયર્ડમેને અનુભવી જો રૂટની વિકેટ લીધી, જે ડ્રાઈવનો પ્રયાસ કરતી વખતે વિકેટની પાછળ કેચ આઉટ થઈ ગયો હતો.
રૂટ પછી તેણે જોર્ડન કોક્સને વિકેટ પાછળ કેચ આઉટ કરાવ્યો અને ત્રીજી વિકેટ લીધી. પછી, તેની ચોથી ઓવરમાં તેણે સેમ કરનને આઉટ કર્યો, જે પોતાનું ખાતું પણ ન ખોલી શક્યો. ત્યારબાદ માહિલ બીયર્ડમેને તેની પાંચમી ઓવરના ચોથા બોલે લિયામ ડોસનને આઉટ કર્યો, જેનાથી તેણે ડેબ્યુ પર ઐતિહાસિક પાંચ વિકેટ લીધી, જેના કારણે ઈંગ્લેન્ડે માત્ર 60 રનમાં સાત વિકેટ ગુમાવી દીધી.
મેન્સ ODI ડેબ્યુ પર સૌથી ઝડપી 5 વિકેટ
- 3.1 ઓવર: ચાર્લી કેસલ vs ઓમાન (2024)
- 3.4 ઓવર: ફિડેલ એડવર્ડ્સ vs ઝિમ્બાબ્વે (2003)
- 4.4 ઓવર: માહિલ બીયર્ડમેન vs ઈંગ્લેન્ડ (2026)
38 વર્ષ પછી ઓસ્ટ્રેલિયન ઈતિહાસનું પુનરાવર્તન
આ ઐતિહાસિક પ્રદર્શન સાથે માહિલ બીયર્ડમેને રેકોર્ડ બુકમાં પોતાનું નામ નોંધાવ્યું છે. તે ODI ડેબ્યુ પર પાંચ વિકેટ લેનાર માત્ર બીજો ઓસ્ટ્રેલિયન બોલર બન્યો છે. 1988માં પર્થના WACA ગ્રાઉન્ડ પર શ્રીલંકા સામે ઓસ્ટ્રેલિયાના ભૂતપૂર્વ ખેલાડી ટોની ડોડેમાઇડના નામે આ રેકોર્ડ હતો. તેણે 21 રન આપીને 5 વિકેટ લીધી હતી. માહિલ બીયર્ડમેન ઓસ્ટ્રેલિયા માટે એક ODIમાં સૌથી ઓછા બોલમાં 5 વિકેટ લેનાર બોલર પણ બન્યો હતો.
ઓસ્ટ્રેલિયા માટે ODIમાં સૌથી ઝડપી 5 વિકેટ
- 4.4 ઓવર (માહિલ બીયર્ડમેન vs ઈંગ્લેન્ડ) (2026)
- 5.5 ઓવર (એન્થોની સ્ટુઅર્ટ vs પાકિસ્તાન) (1997)
- 5.5 ઓવર (ગ્લેન મેકગ્રા vs નામિબિયા) (2003)
- 5.5 ઓવર (કૂપર કોનોલી vs સાઉથ આફ્રિકા) (2025)
