પીવી સિંધુએ ધમાલ મચાવી, પહેલી વાર ફ્રેન્ચ ઓપનની ફાઇનલમાં પહોંચી; વર્લ્ડ નંબર-1 સાથે થશે ટાઈટલની ટક્કર

ભારતની સ્ટાર બેડમિન્ટન ખેલાડી અને બે વખતની ઓલિમ્પિક મેડલ વિજેતા પીવી સિંધુ ફ્રેન્ચ ઓપન 2026ની ફાઈનલમાં પહોંચી ગઈ છે. સિંધુએ શનિવારે સેમીફાઈનલમાં શાનદાર પ્રદર્શન કર્યું અને જાપાનની હિના અકેચીને 2-1થી હરાવી. આ ફ્રેન્ચ ઓપન ફાઈનલમાં તેનો પ્રથમ પ્રવેશ હતો. હવે તે 25 ઓક્ટોબર, રવિવારના રોજ ફાઈનલમાં સાઉથ કોરિયાની વિશ્વ નંબર 1 એન સે યંગનો સામનો કરશે. સિંધુ પાસે આ ટાઈટલ મેચ જીતીને વર્ષનું પોતાનું બીજું સુપર 750 ટાઈટલ જીતવાની સુવર્ણ તક છે.

એક કલાક અને 13 મિનિટ સુધી ચાલી રોમાંચક સેમીફાઈનલ મેચ

આ વર્ષની શરૂઆતમાં જાપાન ઓપન સુપર 750 ટાઈટલ જીતનાર પીવી સિંધુએ ફ્રેન્ચ ઓપન 2026માં પોતાનું પ્રભાવશાળી પ્રદર્શન ચાલુ રાખ્યું. 31 વર્ષીય સિંધુએ એક કલાક અને 13 મિનિટ ચાલેલી સેમીફાઈનલમેચમાં વિશ્વની 22 નંબરની ખેલાડી હિના અકેચીને 21-10, 20-22, 21-16 થી હરાવી. જોકે, સેમીફાઈનલની પહેલી ગેમમાં બંને ખેલાડીઓ વચ્ચે ગાઢ સ્પર્ધા જોવા મળી. સ્કોર 8-8 પર બરાબર રહ્યા બાદ, સિંધુએ ઝડપી ગતિએ રમત ચલાવી, છેલ્લા 12 પોઈન્ટમાંથી 11 પોઈન્ટ જીતીને પ્રથમ ગેમ ફક્ત 18 મિનિટમાં 21-10 થી જીતી લીધી.

બીજી ગેમમાં, જાપાની ખેલાડીએ જોરદાર વાપસી કરી અને સિંધુ પર દબાણ જાળવી રાખ્યું. થોડા સમય માટે પાછળ રહ્યા બાદ, ભારતીય ખેલાડીએ શાનદાર રમત રમી અને 16-16 પર સ્કોર બરાબર કર્યો. ત્યારબાદ સિંધુએ લીડ મેળવી. જોકે, અકેચીએ આખરે સતત બે પોઇન્ટ જીત્યા અને 22-20થી ગેમ જીતી, મેચને નિર્ણાયક ત્રીજી ગેમમાં લઈ ગઈ.

સિંધુએ નિર્ણાયક ગેમ જીતી

પીવી સિંધુએ ત્રીજી ગેમમાં મજબૂત શરૂઆત કરી, અંતરાલ સુધી બે પોઈન્ટની લીડ મેળવી. પરંતુ અકેચીએ હાર ન માની, સ્કોર 15-15 પર બરાબર કર્યો. મેચ ખૂબ જ રોમાંચક રીતે પૂર્ણ થઈ, બંને ખેલાડીઓ દરેક પોઈન્ટ માટે લડી રહી હતી. સિંધુએ આ નિર્ણાયક સમયે પોતાનો અનુભવ દર્શાવ્યો અને શાનદાર પ્રદર્શન કરીને 18-16ની લીડ મેળવી. ત્યારબાદ સિંધુએ શાનદાર નેટ શોટ માર્યો અને અકેચીનો આગળનો શોટ કોર્ટની બહાર ગયો. આનાથી સિંધુને ચાર મેચ પોઈન્ટ મળ્યા. સિંધુએ ક્રોસ-કોર્ટ સ્મેશ સાથે મેચ જીતી લીધી અને પહેલીવાર ફ્રેન્ચ ઓપન ફાઈનલમાં પોતાનું સ્થાન સુરક્ષિત કર્યું.

ફાઈનલમાં એન સે યંગ પાસેથી મળશે મુશ્કેલ પડકાર

સેમીફાઈનલમાં શાનદાર જીત બાદ પીવી સિંધુ હવે ટાઈટલ પર નજર રાખશે. જોકે, ફાઈનલમાં સિંધુનો સામનો વિશ્વની નંબર 1 બેડમિન્ટન ખેલાડી એન સે યંગના સાથે થશે, જેની સામે ભારતીય ખેલાડીનો રેકોર્ડ ખરાબ છે. બંને ખેલાડીઓએ અત્યાર સુધી 10 મેચ રમી છે, જેમાં સિંધુએ હજુ સુધી એક પણ નથી જીતી. સિંધુને આ વર્ષે ઈન્ડોનેશિયા ઓપન અને સિંગાપોર ઓપનમાં પણ સાઉથ કોરિયન શટલર સામે સીધી ગેમમાં હારનો સામનો કરવો પડ્યો હતો. સિંધુએ આ વર્ષે જુલાઈમાં જાપાન ઓપન સુપર 750 ટાઈટલ જીત્યું હતું. હવે, ફ્રેન્ચ ઓપન ફાઈનલ જીતીને તે આ વર્ષે પોતાનું બીજું સુપર 750 ટાઈટલ જીતી શકે છે.