ટેક વર્લ્ડમાં મોટો ભૂકંપ! ચિપમેકર જાયન્ટ Qualcommમાં મોટા પાયે છટણી: ભારતમાં 1,000 એન્જિનિયર્સની નોકરી જોખમમાં!

વિશ્વની અગ્રણી ચિપમેકર કંપની ક્વાલકોમ દ્વારા વૈશ્વિક સ્તરે મોટા પાયે છટણી શરૂ કરવામાં આવી છે. આ પુનર્ગઠન અંતર્ગત કંપનીએ ભારતમાં પણ કર્મચારીઓની છટણી શરૂ કરી દીધી છે, જેમાં આશરે 1,000 જેટલા કર્મચારીઓને અસર થવાની સંભાવના છે. ગયા મહિને સીઈઓ ક્રિસ્ટિયાનો એમોન દ્વારા કર્મચારીઓને મોકલવામાં આવેલા મેમો બાદ કંપની તરફથી કોઈ સત્તાવાર જાહેર નિવેદન આવ્યું નથી, પરંતુ આ રિસ્ટ્રક્ચરિંગ અંગેની મહત્ત્વપૂર્ણ વિગતો સામે આવી છે.

એક અહેવાલ મુજબ, ક્વાલકોમ તેના વૈશ્વિક સ્તરે રહેલા 52,000 કર્મચારીઓમાંથી આશરે 7% સ્ટાફ એટલે કે લગભગ 3,600 જેટલી નોકરીઓમાં કાપ મૂકવા જઈ રહી છે. ભારતમાં બેંગલુરુ, હૈદરાબાદ, દિલ્હી-એનસીઆર અને ચેન્નાઈ સ્થિત ઑફિસોમાં કંપનીના આશરે 20,000 કર્મચારીઓ કાર્યરત છે.

રિપોર્ટ અનુસાર, ભારતમાં આ રાઉન્ડમાં આશરે 1,000 નોકરીઓને અસર થશે, જ્યારે આગામી વર્ષે જાન્યુઆરીમાં છટણીનો બીજો રાઉન્ડ આવવાની શક્યતા છે. આ છટણીમાં સિનિયર એન્જિનિયર્સથી લઈને તાજેતરમાં જોડાયેલા જુનિયર કર્મચારીઓ બંનેને આવરી લેવામાં આવ્યા છે.

કર્મચારીઓએ શેર કરી સેવરન્સ પેકેજની વિગતો

સોશિયલ પ્લેટફોર્મ રેડિટ પર ક્વાલકોમના પ્રભાવિત કર્મચારીઓએ તેમને ઓફર કરવામાં આવેલા સેવરન્સ પેકેજની વિગતો શેર કરી છે. એક કર્મચારીએ જણાવ્યું કે તેને મેનેજર તરફથી વન-ઓન-વન મીટિંગ માટે મેસેજ આવ્યો હતો, જ્યાં તેને છટણી અંગે જાણ કરવામાં આવી હતી. સેવરન્સ પેકેજ હેઠળ કર્મચારીઓને બેઝિક 3 મહિનાનો પગાર અને કંપનીમાં વિતાવેલા દરેક વર્ષ દીઠ વધારાનો 1 મહિનાનો પગાર ઓફર કરવામાં આવી રહ્યો છે (જેમ કે 2 વર્ષની સેવા માટે વધારાના 2 મહિનાનો પગાર).

આ ઉપરાંત, જો પ્રભાવિત કર્મચારી 2થી 3 દિવસની અંદર તમામ સંબંધિત કાગળો પર સહી કરીને સબમિટ કરે, તો કંપની તેમને બોનસ તરીકે વધુ 1 મહિનાનો વધારાનો પગાર ચૂકવવા તૈયાર છે.

ક્વાલકોમ શા માટે કરી રહી છે કર્મચારીઓની છટણી?

રેડિટ પોસ્ટ અનુસાર, મેનેજમેન્ટે કર્મચારીઓને જણાવ્યું હતું કે આ નિર્ણય કોઈ ખરાબ પ્રદર્શનના આધારે નહીં, પરંતુ કંપનીની બિઝનેસ જરૂરિયાતો અને ખર્ચ ઘટાડવાના ભાગરૂપે લેવાયો છે. ગયા મહિને સીઈઓ ક્રિસ્ટિયાનો એમોને વાર્ષિક રિવ્યૂ પછી વૈશ્વિક સ્તરે પર્ફોર્મન્સ-ફોકસ્ડ ઘટાડો કરવાની માહિતી આપી હતી, જેની નોટિફિકેશન નવેમ્બરથી આપવાનું શરૂ થઈ ગયું છે. સ્માર્ટફોન ચિપ માર્કેટમાં આવી રહેલી મંદી મુખ્ય કારણ છે; તાજેતરના ક્વાર્ટરમાં હેન્ડસેટ રેવન્યુમાં 25%નો મોટો ઘટાડો નોંધાયો છે.

આ ઉપરાંત એપલ પ્રોડક્ટ્સમાંથી થતી આવકમાં પણ અપેક્ષા કરતાં વધુ ઝડપી ઘટાડો થવાની સંભાવના વ્યક્ત કરવામાં આવી છે. બીજી તરફ, કંપની ડેટા સેન્ટર્સ, આર્ટિફિશિયલ ઇન્ટેલિજન્સ (AI) અને કનેક્ટેડ ડિવાઇસીસ જેવા નવા ક્ષેત્રોમાં મોટું રોકાણ કરવા માટે પોતાના ખર્ચમાં પુનર્ગઠન કરી રહી છે.

ટેક સેક્ટરમાં સતત છટણીનો દોર

ટેક ઉદ્યોગમાં છટણી કરનારી ક્વાલકોમ એકમાત્ર કંપની નથી, સમગ્ર સેક્ટરમાં આ પ્રકારનું વાતાવરણ જોવા મળી રહ્યું છે:

• અગાઉ કેન્વાએ આંતરિક સુધારાના ભાગરૂપે વૈશ્વિક સ્તરે 1,271 કર્મચારીઓની છટણી કરી હતી, જેમાં મુક્ત થયેલા કર્મચારીઓને ફ્રી મેકબુક અને લિંક્ડઇન પ્રીમિયમ જેવા લાભો અપાયા હતા.
• જેક ડોર્સીની કંપની બ્લોક દ્વારા પણ નોકરીઓમાં કાપ મૂકાયો છે, જેમાં સેવરન્સ ઉપરાંત વધારાના $5,000ની ચૂકવણી કરવામાં આવી રહી છે.
• જોબ ટ્રેકર Layoffs.fyi અનુસાર, ચાલુ વર્ષે 350થી વધુ કંપનીઓમાં 1,42,000થી વધુ ટેક પ્રોફેશનલ્સ પોતાની નોકરી ગુમાવી ચૂક્યા છે.
• આ ઉપરાંત માઇક્રોસોફ્ટ, ગૂગલ અને મેટા જેવી અગ્રણી ટેક જાયન્ટ્સ AI ક્ષેત્રે અબજો ડોલરનું રોકાણ કરવા માટે હજારો કર્મચારીઓને વોલન્ટરી એક્ઝિટના વિકલ્પો આપી રહી છે.