California: ફરીથી કેલિફોર્નિયાના જંગલમાં વિકરાળ આગ લાગી, 50 હજારથી વધુ લોકો પર ખતરો

California: કેલિફોર્નિયાના જંગલોમાં એકવાર ફરી ભીષણ આગ ભભૂકી ઉઠી છે. આગ એટલી પ્રચંડ વેગે આગળ વધી કે અત્યાર સુધી હજારો એકર જમીને પોતાની ઝપટે લીધી છે. આ આગ ઝડપથી ફેલાઈ રહી છે. જેના લીધે 50 હજારથી વધુ લોકોને પોતાના ઘર છોડવા મજબૂર થવાની નોબત આવી છે. વહીવટી તંત્રએ ઘણા વિસ્તારોમાં કટોકટી લાદી દીધી છે. આગ ઓલવવાના પ્રયાસો તેજ કરી દેવામાં આવ્યા છે.
 

ભારે પવન આગને વેગ આપે છે

મળતી માહિતી અનુસાર, આ આગ મુખ્ય ઉત્તરી કેલિફોર્નિયાના સીએરા નેવાડા પ્રદેશમાં ફેલાઈ છે, જ્યાં સતત ભારે પવન અને શુષ્ક હવામાનને કારણે પરિસ્થિતિ વધુ ગંભીર બની છે. સ્થાનિક ફાયર વિભાગ અને સેંકડો ફાયર ફાઇટર આગને કાબુમાં લેવા માટે દિવસ-રાત કામ કરી રહ્યા છે, પરંતુ હજુ સુધી આગ સંપૂર્ણપણે કાબૂમાં આવી નથી.

આગ ફરીથી કેવી રીતે લાગી?

કેલિફોર્નિયા વન વિભાગના જણાવ્યા અનુસાર, આ આગ વીજળી પડવાથી લાગી હશે, પરંતુ તપાસ હજુ પણ ચાલુ છે. ઘણા વિસ્તારો સંપૂર્ણપણે બળી ગયા છે અને ડઝનેક ઘરો રાખમાં ફેરવાઈ ગયા છે. શાળાઓ બંધ કરી દેવામાં આવી છે અને જનજીવન સંપૂર્ણપણે ખોરવાઈ ગયું છે. એક સરકારી અધિકારીએ જણાવ્યું કે, પરિસ્થિતિ ગંભીર છે અને વધુમાં કહ્યું, "આ એક આબોહવા આપત્તિ છે. અમે લોકોના જીવન અને સંપત્તિનું રક્ષણ કરવા માટે દરેક શક્ય સંસાધનોનો ઉપયોગ કરી રહ્યા છીએ." તેમણે નેશનલ ગાર્ડને પણ તૈનાત કર્યા છે.

સરકારે માર્ગદર્શિકા જાહેર કરી
અસરગ્રસ્ત લોકો માટે રાહત શિબિરો સ્થાપવામાં આવ્યા છે, પરંતુ ગરમી, ધૂમાડો અને આરોગ્યને લગતી સમસ્યાઓને કારણે પડકારો વધી રહ્યા છે. નિષ્ણાતો કહે છે, જો હવામાન બદલાશે નહીં, તો આ આગ વધુ વિનાશક સ્વરૂપ લઈ શકે છે. સરકારે લોકોને સાવચેત રહેવા અને અધિકારીઓની માર્ગદર્શિકાનું પાલન કરવાની અપીલ કરી છે.