Video: વિશ્વપ્રસિદ્ધ આંતરરાષ્ટ્રીય પશુમેળા માટે પુષ્કરમાં ઉમટ્યા દેશભરના પશુપાલકો!

રાજસ્થાનના પુષ્કરમાં મેળાનો ભવ્ય પ્રારંભ

વિશ્વપ્રસિદ્ધ આંતરરાષ્ટ્રીય પશુમેળા માટે પુષ્કરમાં ઉમટ્યા દેશભરના પશુપાલકો!

સૂર્યોદયના અદભુત નજારા અને રણની સુંદરતા વચ્ચે પ્રવાસીઓમાં ભારે ઉત્સાહ!

રાજસ્થાનના જગપ્રસિદ્ધ અને સાંસ્કૃતિક નગરી પુષ્કરમાં વિશ્વપ્રસિદ્ધ અંતરરાષ્ટ્રીય પુષ્કર પશુમેળાની ધામધૂમપૂર્વક શરૂઆત થઈ ગઈ છે. રણની આ પવિત્ર ભૂમિ પર દેશના ખૂણે-ખૂણેથી પશુપાલકો, ઊંટના વેપારીઓ અને હજારો પ્રવાસીઓ પોતાના પશુઓ સાથે મેળાના મેદાન પર પહોંચી રહ્યા છે. પુષ્કરના આ ઐતિહાસિક મેળામાં માત્ર પશુઓની લેવડ-દેવડ જ નહીં, પરંતુ રાજસ્થાનની લોક સંસ્કૃતિ, કલા અને પરંપરાના અદભુત દર્શન થાય છે, જે આ મેળાને દુનિયાભરમાં અનોખી ઓળખ અપાવે છે. મેળાની શરૂઆત સાથે જ મેળાના મેદાન પર પશુપાલકોની ભારે ભીડ જોવા મળી રહી છે. ઉત્તમ નસ્લના ઘોડા, ઊંટો અને અન્ય પશુઓની ખરીદી તથા વેચાણ માટે વ્યાપારીઓ વચ્ચે સોદાબાજી શરૂ થઈ ચૂકી છે. ભીલવાડાથી આવેલા અનિલ ભુત્રા સહિતના પ્રવાસીઓએ પોતાના અનુભવ જણાવતા કહ્યું કે પુષ્કરની આ સફર અત્યંત અદભુત છે. અહીં વહેલી સવારના સૂર્યોદયના દર્શન કરવા એ એક અલગ જ લહાવો છે, જે પ્રવાસીઓને મંત્રમુગ્ધ કરી દે છે.

પુષ્કરમાં માત્ર પશુમેળો જ નહીં, પરંતુ એડવેન્ચર પ્રવાસન પણ પ્રવાસીઓ માટે મુખ્ય આકર્ષણનું કેન્દ્ર બન્યું છે. મેળાની મુલાકાતે આવેલા નાના બાળકો અને યુવાનો ડેઝર્ટમાં કેમલ રાઈડ, એટીવી બાઈક રાઈડ અને રોમાંચક જીપ સફારીની ભરપૂર મજા માણી રહ્યા છે. પ્રવાસીઓએ કેમેરામાં આ સુંદર ક્ષણોને કંડારીને સોશિયલ મીડિયા પર તેની ખુશી વ્યક્ત કરી છે. ખાસ કરીને યુવા વર્ગમાં એટીવી રાઈડ અને ડેઝર્ટ સફારીને લઈને ભારે ઉત્સાહ જોવા મળી રહ્યો છે. આગામી દિવસોમાં આ મેળામાં ધાર્મિક અનુષ્ઠાનો તેમજ વિવિધ સાંસ્કૃતિક કાર્યક્રમોની પણ શરત થવાની છે, જેમાં રાજસ્થાનના લોક નૃત્યો અને સંગીતના રંગો જામશે. સ્થાનિક પ્રશાસન દ્વારા દેશ-વિદેશથી આવતા લાખો શ્રદ્ધાળુઓ અને પ્રવાસીઓ માટે રહેવા, જમવા અને સુરક્ષાની ઉત્તમ વ્યવસ્થાઓ ગોઠવવામાં આવી છે. પુષ્કરનો આ મેળો માત્ર વ્યાપારનું કેન્દ્ર નથી, પરંતુ તે ભારતીય સંસ્કૃતિ અને મહેમાનગતિનું જીવંત પ્રતીક છે.

પુષ્કરના આંતરરાષ્ટ્રીય પશુમેળાએ ફરી એકવાર સાબિત કરી દીધું છે કે રાજસ્થાનની આ પરંપરાગત ધરોહર આધુનિક યુગમાં પણ એટલી જ લોકપ્રિય અને જીવંત છે. પ્રવાસીઓ અને પશુપાલકોની ઉપસ્થિતિથી ધમધમતું પુષ્કરધામ હાલ ઉત્સવના રંગમાં રંગાઈ ગયું છે, જે આગામી દિવસોમાં પર્યટન ક્ષેત્રે નવા રેકોર્ડ સર્જવા જઈ રહ્યું છે.

બ્યૂરો રિપોર્ટ જીએસટીવી