લોકસભાની સીટો 543થી વધીને 850 થશે? પરિસીમન બિલ માટે વિશેષ સત્ર બોલાવવાની સરકારની તૈયારી!

કેન્દ્ર સરકાર મહિલા અનામત લાગુ કરવા માટેના બંધારણીય સુધારા બિલને પસાર કરાવવા ટૂંક સમયમાં સંસદનું વિશેષ સત્ર બોલાવી શકે છે. એક સમાચાર એજન્સીના અહેવાલ મુજબ, આ પ્રસ્તાવિત સુધારા હેઠળ સીમાંકન દ્વારા લોકસભાની વર્તમાન 543 બેઠકોની સંખ્યા વધારીને મહત્તમ 850 કરવાનો લક્ષ્યાંક રાખવામાં આવ્યો છે. આ બિલ પસાર થવાની સાથે જ સંસદ અને રાજ્ય વિધાનસભાઓમાં મહિલાઓ માટે 33 ટકા અનામત લાગુ કરવાનો માર્ગ મોકળો થઈ જશે.

સરકારને 15થી 18 મતોના અંતરથી બિલ પસાર થવાનો વિશ્વાસ

સૂત્રોના જણાવ્યા અનુસાર, સરકારને વિશ્વાસ છે કે તેની પાસે જરૂરી સંખ્યાબળ મોજૂદ છે અને આ બિલ 15થી 18 મતોના અંતરથી પસાર થઈ જશે. જોકે, પ્રસ્તાવિત સત્રની તારીખો કે સમયગાળા અંગે હજુ સુધી કોઈ સત્તાવાર માહિતી આપવામાં આવી નથી. બંધારણીય સુધારા બિલ પસાર કરાવવા માટે બે-તૃતીયાંશ બહુમતીની જરૂર પડે છે, જેના માટે 361 મતોની આવશ્યકતા રહે છે. 543 સભ્યોની લોકસભામાં હાલ 3 બેઠકો ખાલી છે. અગાઉ સરકારે 17 એપ્રિલના રોજ બજેટ સત્ર દરમિયાન આ બિલ પસાર કરાવવાનો પ્રયાસ કર્યો હતો, પરંતુ જરૂરી સંખ્યાબળ ન હોવાથી તે પસાર થઈ શક્યું ન હતું.

સત્રાવસાન ન થવાને કારણે ટૂંકી નોટિસ પર સત્ર બોલાવવું સરળ

સંસદને ટૂંકા સમયની નોટિસ પર બોલાવવાની શક્યતા હજુ પણ યથાવત છે, કારણ કે ચોમાસુ સત્રનું હજુ સુધી ઔપચારિક રીતે સત્રાવસાન કરવામાં આવ્યું નથી. 13 ઓગસ્ટના રોજ ચોમાસુ સત્રને અનિશ્ચિતકાળ માટે સ્થગિત કરવામાં આવ્યું હતું. આ સત્ર હવે 91 દિવસથી સત્રાવસાન વિના ચાલી રહ્યું છે, જેણે વર્ષ 2008ના 87 દિવસના અગાઉના રેકોર્ડને તોડી નાખ્યો છે. નિયમ મુજબ, વર્તમાન સત્રની અંદર જ કોઈ બેઠક લંબાવવા માટે ઓછામાં ઓછી 2 દિવસની નોટિસની જરૂર પડે છે, જ્યારે નવું સત્ર બોલાવવા માટે 14 દિવસની નોટિસ આપવી પડે છે. સરકારના આ નિર્ણયથી વિશેષ બેઠક બોલાવવાની અટકળો તેજ બની છે.

તમામ રાજ્યોની બેઠકોમાં 50 ટકા વધારાનો પ્રસ્તાવ

દક્ષિણના રાજ્યોની ચિંતાઓને દૂર કરવા માટે સરકારે તમામ રાજ્યોની લોકસભા બેઠકોની સંખ્યામાં 50 ટકાનો વધારો કરવાનો પ્રસ્તાવ મૂક્યો છે. સરકાર 2029ની લોકસભા ચૂંટણી પહેલા મહિલા અનામત કાયદો લાગુ કરવા માંગે છે. અગાઉના બિલના આધારે તૈયાર કરાયેલા આ નવા મુસદ્દામાં 1971ની વસ્તી ગણતરી મુજબ રાજ્યો વચ્ચે બેઠકોનું વર્તમાન પ્રમાણ જાળવી રાખવાનો પ્રસ્તાવ છે.

સત્રાવસાન અને સીમાંકન મુદ્દે કોંગ્રેસના સરકાર પર પ્રહાર

સંસદનું સત્રાવસાન ન કરવા મામલે કોંગ્રેસ સતત આક્રમક વલણ અપનાવી રહી છે. 9 નવેમ્બરના રોજ કોંગ્રેસ મહાસચિવ જયરામ રમેશે જણાવ્યું હતું કે, સંસદને અનિશ્ચિતકાળ માટે સ્થગિત કર્યાને 88 દિવસ થઈ ગયા હોવા છતાં તેનું સત્રાવસાન કરવામાં આવ્યું નથી. કોંગ્રેસ નેતા જયરામ રમેશે નિવેદન આપતા કહ્યું હતું કે, 'આજે એક નવો રેકોર્ડ બન્યો છે. આ રેકોર્ડ એટલા માટે બનાવવામાં આવ્યો છે જેથી કેન્દ્રીય ગૃહમંત્રીને લોકસભામાં કોઈક રીતે શંકાસ્પદ બે-તૃતીયાંશ બહુમતી એકત્ર કરવાનો સમય મળી શકે, જેનાથી ખતરનાક અને વિનાશકારી સીમાંકન બિલ પસાર કરાવી શકાય. વિપક્ષની એ એકતા, જેણે 17 એપ્રિલ 2026ના રોજ તેમના કુટિલ ઈરાદાઓને કારમી હાર આપી હતી, તે ફરી એકવાર કામ આવશે, જો તેઓ પોતાની જાણીતી બુલડોઝર વાળી રણનીતિનું પુનરાવર્તન કરશે.'

સર્વપક્ષીય બેઠક બોલાવવાની માંગ નકારાઈ હોવાનો આક્ષેપ

જયરામ રમેશે વધુમાં આક્ષેપ કરતા કહ્યું હતું કે, 'કોંગ્રેસ અધ્યક્ષે છેલ્લા 6 મહિનામાં વડાપ્રધાનને 4 વખત પત્ર લખીને આગ્રહ કર્યો છે કે સીમાંકન પર તમામ પક્ષોની એક બેઠક બોલાવવામાં આવે, જેથી કોઈ પણ કાયદો રજૂ કરતા પહેલા તમામ પ્રસ્તાવો પર પારદર્શક રીતે અને વિસ્તારપૂર્વક ચર્ચા થઈ શકે. વડાપ્રધાને આમ કરવાનો સ્પષ્ટ ઈનકાર કરી દીધો છે.'