સોનમ વાંગચુક સામે તંત્રની મોટી કાર્યવાહી: વિરોધ સ્થળેથી હટાવ્યા

કેન્દ્રશાસિત પ્રદેશ લદાખના પ્રશાસને જાણીતા પર્યાવરણ અને સામાજિક કાર્યકર સોનમ વાંગચુક સામે મોટી કાર્યવાહી કરી છે. તંત્રએ વાંગચુકની અવરજવર અને જાહેર ગતિવિધિઓ પર આગામી 60 દિવસ માટે પ્રતિબંધ મૂકી દીધો છે.

પોલીસ કાર્યવાહી બાદ પ્રતિબંધનું ફરમાન

બુધવારે રાત્રે લદાખ પોલીસે સાવચેતીના ભાગરૂપે કાર્યવાહી કરીને વાંગચુકને લેહના NDS મેમોરિયલ પાર્ક સ્થિત વિરોધ સ્થળેથી હટાવી દીધા હતા. ત્યારબાદ લેહના અધિક જિલ્લા મેજિસ્ટ્રેટ દ્વારા 'ભારતીય નાગરિક સુરક્ષા સંહિતા' (BNSS), 2023 ની કલમ 163 હેઠળ આ પ્રતિબંધાત્મક આદેશ જારી કરવામાં આવ્યો છે.

રેલી, સરઘસ કે ભૂખ હડતાળ પર રોક

આ આદેશ મુજબ, સોનમ વાંગચુક કોઈપણ અનધિકૃત રેલી, સરઘસ કે જાહેર સભાનું આયોજન કરી શકશે નહીં કે તેમાં ભાગ લઈ શકશે નહીં. લેહના વરિષ્ઠ પોલીસ અધિક્ષક (SSP) ના અહેવાલ બાદ આ નિર્ણય લેવાયો છે, જેમાં તેમના ભૂખ હડતાળ અને જનસભા જેવા આગામી કાર્યક્રમોથી જિલ્લામાં કાયદો અને વ્યવસ્થાની સ્થિતિ બગડવાની આશંકા વ્યક્ત કરવામાં આવી હતી.

ચૂંટણી પ્રક્રિયા અને આચારસંહિતાનું કારણ

પ્રશાસને જણાવ્યું છે કે હાલમાં લદાખમાં નગર સમિતિ, પંચાયતો અને લદાખ સ્વાયત્ત પહાડી વિકાસ પરિષદ (LAHDC), લેહની ચૂંટણીઓ ચાલી રહી છે અને 'આદર્શ આચારસંહિતા' લાગુ છે. જો આવી ગતિવિધિઓને રોકવામાં ન આવે, તો શાંતિપૂર્ણ ચૂંટણી પ્રક્રિયામાં અવરોધ ઊભો થઈ શકે છે. કારગિલ ડેમોક્રેટિક એલાયન્સ (KDA) ના નેતા સજ્જાદ કારગિલીએ સોશિયલ મીડિયા પ્લેટફોર્મ 'X' પર આ આદેશની નકલ શેર કરી છે.

લેહ એપેક્સ બોડીના ધરણા અને કેન્ડલ માર્ચની જાહેરાત

વાંગચુક પર આ નિયંત્રણો એવા સમયે લગાવાયા છે જ્યારે 'લેહ એપેક્સ બોડી' (LAB) એ ફરીથી વિરોધ પ્રદર્શનો શરૂ કર્યા છે. આચારસંહિતા વચ્ચે પણ LAB દ્વારા ગુરુવારે શાંતિપૂર્ણ ધરણા યોજવામાં આવ્યા હતા, જેમાં મોટી સંખ્યામાં લોકો જોડાયા હતા. બીજી તરફ, લદાખના મુદ્દાઓ અને આંદોલનને સમર્થન આપવા માટે KDA એ શનિવારે સાંજે કારગિલમાં કેન્ડલ માર્ચ કાઢવાની જાહેરાત કરી છે.